CBIC New Chairman: केंद्र सरकारने महसूल आणि सीमाशुल्क प्रशासनात मोठा बदल करत 1990 बॅचचे आयआरएस अधिकारी विवेक चतुर्वेदी यांची केंद्रीय अप्रत्यक्ष कर आणि सीमाशुल्क मंडळाचे (CBIC) नवे अध्यक्ष म्हणून नियुक्ती केली आहे. मंत्रिमंडळाच्या नियुक्ती समितीने (ACC) जारी केलेल्या अधिकृत आदेशानुसार ते तात्काळ कार्यभार स्वीकारणार आहेत.
नियुक्तीचा महत्त्वाचा निर्णय
सध्या CBIC मध्ये सदस्य म्हणून कार्यरत असलेले चतुर्वेदी आता मंडळातील सर्वोच्च पदावर विराजमान होणार आहेत. GST, सीमाशुल्क आणि केंद्रीय उत्पादन शुल्क यांसारख्या अप्रत्यक्ष कर व्यवस्थापनाची संपूर्ण जबाबदारी असलेल्या या संस्थेचे नेतृत्व मिळणे ही एक महत्त्वपूर्ण प्रशासकीय घटना मानली जात आहे. ही नियुक्तीची आज्ञा कार्मिक आणि प्रशिक्षण विभागाने (DoPT) जारी केली असून यावर उपसचिव सुबीर कुमार यांच्या स्वाक्षऱ्या आहेत. आदेशाच्या प्रत पंतप्रधान कार्यालय, कॅबिनेट सचिवालय, अर्थ मंत्रालयाच्या महसूल विभागासह इतर महत्त्वाच्या सरकारी यंत्रणांना पाठवण्यात आली आहे.
CBIC म्हणजे काय?
CBIC ही देशातील अप्रत्यक्ष कर व्यवस्थापनाची सर्वोच्च संस्था आहे. GST, सीमाशुल्क, केंद्रीय उत्पादन शुल्क या तिन्ही महत्त्वाच्या विभागांची धोरणात्मक जबाबदारी आणि अंमलबजावणीचे काम CBIC पाहते.
नव्या अध्यक्षांचा अनुभव
विवेक चतुर्वेदी यांना कर प्रणाली, सीमाशुल्क प्रशासन, डिजिटल कर प्रणाली आणि धोरण आखणीमध्ये व्यापक अनुभव आहे. त्यांच्या नियुक्तीमुळे कर व्यवस्थापनात अधिक पारदर्शकता, तांत्रिक आधुनिकीकरण आणि कार्यक्षमता वाढण्याची अपेक्षा व्यक्त केली जात आहे.
केंद्र सरकारचा दृष्टिकोन
अलिकडच्या काळात केंद्र सरकारने कर व प्रशासकीय सेवांमधील वरिष्ठ पदांवर जलद फेरबदल करण्यावर भर दिला आहे. धोरण अंमलबजावणी अधिक प्रभावी करण्यासाठी आणि देखरेख मजबूत करण्यासाठी हा बदल महत्त्वाचा मानला जात आहे. नव्या अध्यक्षांच्या नियुक्तीमुळे अप्रत्यक्ष कर व्यवस्थापनात नवीन दिशा आणि गती येण्याची शक्यता व्यक्त केली जात आहे.
