US Intelligence warning to Iran on Leaders’ Assassination : इराणचे परराष्ट्रमंत्री अब्बास अराघची आणि संसदेचे अध्यक्ष मोहम्मद बाघेर गालिबाफ यांच्या हत्येचा प्रयत्न इस्रायलकडून होऊ शकतो, अशी अत्यंत संवेदनशील पूर्वसूचना अमेरिकी अधिकाऱ्यांनी इराणला दिली आहे. काही दिवसांपूर्वीच इराणविरोधात आक्रमक पवित्रा घेणाऱ्या अमेरिकेने आता स्वतःहून पुढाकार घेत इराणला संभाव्य धोक्याबाबत सावध केले आहे. वॉशिंगटन पोस्ट आणि न्यू यॉर्क टाईम्सने अमेरिकेच्या आजी-माजी वरिष्ठ अधिकाऱ्यांच्या हवाल्याने या धक्कादायक कटाचे वृत्त प्रसिद्ध केले आहे. या गुप्तचर इशाऱ्यामुळे आंतरराष्ट्रीय राजकारणात मोठी खळबळ उडाली आहे.
मध्यस्थांच्या हत्येची अमेरिकेला भीती
अमेरिका आणि इराण यांच्यातील युद्ध अधिकृतपणे समाप्त करण्यासाठी एका सामंजस्य करारावर स्वाक्षऱ्या झाल्या आहेत. या करारानंतर दोन्ही देशांमधील संघर्षावर कायमस्वरूपी तोडगा काढण्यासाठी 60 दिवसांच्या कालावधीची वाटाघाटी सुरू झाली आहे. या महत्त्वाच्या चर्चेत इराणची बाजू मांडणारे मुख्य मध्यस्थ अराघची आणि गालिबाफ हेच आहेत. जर या मध्यस्थांचीच हत्या झाली, तर सुरू असलेली शांतता चर्चा पूर्णपणे फिसकटून पुन्हा एकदा भीषण युद्ध सुरू होईल, अशी भीती अमेरिकी अधिकाऱ्यांनी व्यक्त केली आहे. ‘तुम्ही नेत्यांना नाही तर थेट मध्यस्थांनाच ठार करत आहात,’ अशा शब्दांत अमेरिकेने चिंता व्यक्त केली आहे.
Netanyahu wanted to ASSASSINATE Iranian negotiators, including ARAGHCHI & GHALIBAF… …before Trump INTERVENED to 'SAVE' Ceasefire TALKS — NYT Claims Washington WARNED Tehran through allies — SAVING THEM from Israeli jets post-talks pic.twitter.com/ahy4kLdN7f — RT (@RT_com) July 2, 2026
अमेरिका आणि इस्रायलमधील वाढते मतभेद
इराणविरुद्ध एकत्र रणशिंग फुंकणाऱ्या अमेरिका आणि इस्रायल या मित्रराष्ट्रांमध्ये आता या मुद्द्यावरून मतभेद कमालीचे वाढले आहेत. अमेरिकेचे राष्ट्राध्यक्ष डोनाल्ड ट्रम्प यांची हा शांतता करार यशस्वीरीत्या पूर्ण व्हावा अशी तीव्र इच्छा असल्याचे व्हाईट हाऊसच्या गोटातून सांगण्यात आले आहे. याच कारणामुळे वाटाघाटींचा हा टप्पा सुरू असताना इराणवर कोणताही हल्ला करू नये, अशी स्पष्ट विनंती अमेरिकेने इस्रायलला यापूर्वीच केली आहे. मात्र, इस्रायलने अद्याप या संपूर्ण प्रकरणावर किंवा हत्येच्या कटाच्या दाव्यावर कोणतीही अधिकृत प्रतिक्रिया दिलेली नाही.
यापूर्वीही झाला होता प्रयत्न
अमेरिकी अधिकाऱ्यांनी दिलेल्या माहितीनुसार, या इराणी मध्यस्थांना लक्ष्य करण्याचा प्रयत्न यापूर्वीही झालेला आहे. सध्या अमेरिका हा संघर्ष कायमचा मिटवण्यासाठी सर्वतोपरी प्रयत्न करत असल्याने नेत्यांच्या सुरक्षेसाठी त्यांनी इराणला सतर्क राहण्याची महत्त्वाची सूचना केली आहे. यापूर्वी इराणला पृथ्वीवरून नाहीसे करण्याची भाषा करणाऱ्या अमेरिकेने आता थेट इराणला इस्रायलपासून सावध राहण्याचा इशारा देणे, हे बदलत्या जागतिक समीकरणांचे संकेत मानले जात आहेत.
