Zaheer Alam Passed Away: संगीत विश्वातून एक अत्यंत दुःखद बातमी समोर आली आहे. आपल्या शब्दांनी 90 च्या दशकात संपूर्ण देशाला वेड लावणारे ‘तुम तो ठहरे परदेसी साथ क्या निभाओगे’ या अजरामर गीताचे गीतकार जहीर आलम यांचे निधन झाले आहे. 11 मे रोजी नागपूर येथे त्यांनी अखेरचा श्वास घेतला. त्यांनी लिहिलेले हे गीत आजही तितकेच लोकप्रिय असून, गायक अल्ताफ राजा यांच्या आवाजामुळे ते घराघरांत पोहोचले होते.
अल्ताफ राजा यांच्या आवाजाने गीताला दिले अमरत्व
‘तुम तो ठहरे परदेसी’ हे गीत सुरुवातीला स्थानिक पातळीवर कव्वाली म्हणून सादर केले जात असे. मात्र, जेव्हा अल्ताफ राजा यांनी याला आपला आवाज दिला, तेव्हा या गीताने लोकप्रियतेचे सर्व विक्रम मोडीत काढले. 1990 च्या दशकात हे गीत प्रत्येक रेडिओ आणि कॅसेट प्लेयरवर वाजत असायचे. जहीर आलम यांनी लिहिलेल्या या शब्दांनी अल्ताफ राजा यांच्या कारकिर्दीला मोठी उंची मिळवून दिली आणि हे गीत संगीत क्षेत्रातील एक मैलाचा दगड ठरले.
आयुष्य संघर्षातच सरले
जहीर आलम हे नागपूरच्या मोमिनपुरा भागात एका साध्याशा घरात राहत होते. त्यांचे गीत जगभर गाजले असले, तरी त्यांचे वैयक्तिक आयुष्य मात्र अत्यंत गरिबीत आणि आर्थिक अडचणीत गेले. या गाजलेल्या गीतासाठी त्यांना मानधन म्हणून केवळ 3,000 रुपये मिळाले होते, असे सांगितले जाते. आयुष्याच्या उत्तरार्धात ते प्रसिद्धीच्या झोतातून पूर्णपणे बाहेर फेकले गेले होते आणि मोमिनपुरा भागातील रहिवाशांमध्येही ते विस्मृतीत गेले होते.
कापड गिरणीतील कामगार ते प्रसिद्ध गीतकार
गीतकार म्हणून नाव मिळवण्यापूर्वी जहीर आलम यांनी एका कापड गिरणीत काम केले होते. जोपर्यंत गिरणी सुरू होती, तोपर्यंत त्यांचे आयुष्य स्थिर होते. मात्र, गिरणी बंद पडल्यानंतर त्यांच्यासमोर आर्थिक संकटांचा डोंगर उभा राहिला. प्रचंड प्रतिभावान असूनही त्यांना योग्य तो आर्थिक लाभ किंवा सन्मान मिळू शकला नाही. त्यांच्या निधनामुळे संगीत क्षेत्रातील एक साधी पण प्रभावशाली प्रतिभा हरपल्याची भावना व्यक्त केली जात आहे.
