Jagannath Rath Yatra Stampede: जगन्नाथ रथयात्रेत चेंगराचेंगरीसारखी परिस्थिती; 2 भाविकांचा मृत्यू, 100 हून अधिक जखमी

Jagannath Rath Yatra Stampede: ओडिशामधील पुरी येथील जगन्नाथ रथयात्रेदरम्यान भाविकांची प्रचंड गर्दी उसळल्याने चेंगराचेंगरीसारखी गंभीर परिस्थिती निर्माण झाली. या दुर्घटनेत 2 जणांचा मृत्यू झाला असून अनेक भाविक जखमी व बेशुद्ध झाले आहेत. मृत पावलेल्यांमध्ये गर्दीत गुदमरल्यामुळे प्राण गमावलेल्या एका महिला भाविकाचा आणि हृदयविकाराच्या तीव्र झटक्याने मृत्यू झालेल्या एका 35 वर्षीय तरुणाचा समावेश आहे. PTI या वृत्तसंस्थेनुसार, या गोंधळात अनेक लोक बेशुद्ध पडले असून बाधित भाविकांना तातडीने उपचारासाठी रुग्णालयात दाखल करण्यात आले आहे.

अतिगर्दी आणि दमट हवामानामुळे भाविक आजारी

प्रशासनाने दिलेल्या स्पष्टीकरणानुसार, या ठिकाणी कोणतीही प्रत्यक्ष चेंगराचेंगरी झाली नाही; मात्र कमालीची गर्दी आणि दमट वातावरणामुळे गुदमरून भाविक आजारी पडले. ‘बडा दांडा’ येथे रथांची प्रतीक्षा करत असताना भाविकांचा दाब वाढल्याने अनेकांना श्वास घेण्यास त्रास होऊ लागला. प्राथमिक माहितीनुसार, ही घटना ‘पाहंडी’ विधी सुरू असताना बाह्य सुरक्षा कक्षेपासून सुमारे 500 मीटर अंतरावर घडली. या गर्दीच्या दबावामुळे अचानक गोंधळ उडाला आणि जवळपास 200 हून अधिक भाविक जखमी झाले, ज्यामध्ये महिला आणि वृद्धांची संख्या अधिक आहे.

#WATCH | Odisha: Lakhs of devotees participate in the world-famous annual Rath Yatra of Lord Jagannath and his two siblings in Puri pic.twitter.com/W9BKO0ph0l — ANI (@ANI) July 16, 2026

तातडीने मदत आणि बचाव कार्य सुरू

घटनेची माहिती मिळताच घटनास्थळी तैनात असलेल्या पोलीस, स्थानिक प्रशासन आणि आरोग्य पथकांनी त्वरित धाव घेत बचाव कार्य हाती घेतले. बाधित भाविकांना तातडीने रुग्णवाहिकेच्या साहाय्याने जवळच्या रुग्णालयात हलवण्यात आले असून सध्या त्यांच्यावर उपचार सुरू आहेत. दरम्यान, स्थानिक सूत्रांनी एका भाविकाच्या मृत्यूची पुष्टी केली असली, तरी प्रशासनाकडून या प्रकरणाचा सखोल तपास आणि अधिकृत दुजोरा मिळणे अद्याप बाकी आहे.

हेही वाचा – Maulana Jarjis: ‘ श्रीकृष्ण दिवसातून पाच वेळा नमाज पठण करायचे…’; मौलाना जरजिस यांच्या वादग्रस्त वक्तव्यामुळे प्रचंड संताप

प्रशासनासमोर गर्दी नियंत्रणाचे मोठे आव्हान

दरवर्षी पुरी येथील जगन्नाथ रथयात्रेसाठी देशभरातून आणि परदेशातून लाखो भाविक दर्शनासाठी येतात. या वर्षीही रथ ओढण्याच्या मुख्य विधीवेळी भाविकांचा जनसागर उसळला होता, ज्यामुळे गर्दीचे व्यवस्थापन करणे यंत्रणांसाठी कठीण बनले. ही अनपेक्षित परिस्थिती नेमकी कशामुळे निर्माण झाली, याचा शोध घेण्यासाठी सध्या प्रशासनाकडून चौकशी सुरू आहे.