Trump Tariffs: अमेरिकेत सणासुदीचा काळ जवळ आला असताना देशातील हजारो लहान व्यवसाय गंभीर अडचणीत सापडले आहेत. अमेरिकेचे राष्ट्राध्यक्ष डोनाल्ड ट्रम्प यांनी चीनमधून आयात होणाऱ्या वस्तूंवर लादलेल्या नव्या टॅरिफ दरांमुळे पुरवठा साखळी विस्कळीत झाली असून, किरकोळ विक्रेत्यांना मोठ्या प्रमाणावर स्टॉक तुटवड्याचा सामना करावा लागत आहे. अनेक कंपन्या सुट्टीच्या हंगामापूर्वीच जवळजवळ रिकाम्या गोदामांसह उभ्या आहेत.
लहान कंपन्यांचा सणासुदीचा बाजार धोक्यात
न्यूयॉर्कस्थित ‘लॉफ्टी’ नावाच्या स्लीप-टेक ब्रँडचे संस्थापक मॅट हॅसेट यांनी सांगितले की, या वर्षी परिस्थिती हाताबाहेर गेली आहे. चीनमधून आयात होणाऱ्या त्यांच्या ‘सूर्योदय दिवे’ आणि ‘फोन-फ्री अलार्म क्लॉक्स’साठी लागणाऱ्या वस्तूंवर अचानक वाढलेल्या शुल्कामुळे उत्पादन वेळेवर मिळत नाही. हॅसेट म्हणाले, “आमच्याकडे आवश्यक असलेल्या इन्व्हेंटरीपैकी फक्त 10 टक्के साठा उरला आहे. तयारी करणे जवळजवळ अशक्य झाले आहे.”
किरकोळ विक्रेत्यांचे गणित कोलमडले
ट्रम्प प्रशासनाने गेल्या काही महिन्यांत चीनवरील शुल्क दरात वारंवार बदल केले. कधी 180 टक्क्यांपर्यंत वाढ तर कधी 20 टक्क्यांपर्यंत घट. या सततच्या अनिश्चिततेमुळे लहान कंपन्यांना पुरवठादार बदलण्याचा विचार करावा लागला. मात्र, ऑर्डर उशिरा मिळाल्याने सणासुदीत मागणी वाढण्यापूर्वीच स्टॉक संपत चालला.
मोठे विक्रेते मात्र सुरक्षित
वॉलमार्ट, कॉस्टकोसारख्या दिग्गज कंपन्यांवर या टॅरिफचा फारसा परिणाम झाला नाही. त्यांच्या मोठ्या खरेदी क्षमतेमुळे आणि विविध पुरवठा साखळ्यांमुळे त्यांनी संकटावर नियंत्रण ठेवले. मात्र लहान व्यवसायांची परिस्थिती बिकट आहे. रॅपिडरेटिंग्सच्या अहवालानुसार, 50 दशलक्ष डॉलरपेक्षा कमी मालमत्ता असलेल्या लहान किरकोळ व्यवसायांचा ऑपरेटिंग नफा 20.7 टक्क्यांनी घसरला, त्यांपैकी 36 टक्के कंपन्या दिवाळखोरीच्या उंबरठ्यावर उभ्या आहेत. तथापी, मोठ्या कंपन्यांसाठी हा धोका फक्त 12 टक्के आहे. दरम्यान, टॅरिफ लागू होण्यापूर्वी काही कंपन्यांनी मोठ्या प्रमाणात स्टॉक ऑर्डर केला. परंतु आता ग्राहकांचा आत्मविश्वास कमी झाल्याने तो माल विकला न गेल्याची स्थिती निर्माण झाली आहे. काहींना किंमती वाढवाव्या लागल्या, तर काहींनी खर्च नियंत्रणासाठी कर्मचारी कपात केली आहे.
अमेरिकन बाजारपेठेत अराजकतेची स्थिती
तज्ज्ञांच्या मते, टॅरिफमधील अनिश्चितता आणि पुरवठा साखळीतील अडथळ्यांमुळे अमेरिकेत लहान व्यवसायांची अवस्था अधिकच गंभीर होऊ शकते. सणासुदीचा कालावधी हा अमेरिकन किरकोळ व्यवसायांसाठी वर्षातील सर्वात महत्त्वाचा असतो. परंतु या वर्षी अनेक छोट्या व्यापाऱ्यांवर मोठे आर्थिक संकट येण्याची भीती आहे.
