JioHotstar Chiraiya Web Series : 'मॅरिटल रेप' सारख्या धाडसी आणि संवेदनशील विषयावर भाष्य करणारी 'चिरैया' ही वेब सिरीज सध्या ओटीटीवर प्रचंड गाजत आहे. जिओ हॉटस्टारवर 20 मार्च 2026 रोजी प्रदर्शित झालेली ही सिरीज अवघ्या 6 भागांची असून, प्रदर्शनाच्या 14 दिवसांनंतरही ती टॉप ट्रेंडिंगमध्ये कायम आहे. या सिरीजमधील एका भयाण दृश्याच्या शूटिंगदरम्यान मुख्य अभिनेता सिद्धार्थ शॉ याला आपले अश्रू अनावर झाले होते आणि तो अक्षरशः थरथर कापू लागला होता, ज्याची चर्चा आता सोशल मीडियावर सुरू आहे.
शूटिंगदरम्यान सिद्धार्थला फुटला हुंदका
या सिरीजमध्ये अरुण (सिद्धार्थ शॉ) आणि पूजा (प्रसन्ना बिष्त) यांच्यातील लग्नाच्या पहिल्या रात्रीचे एक हृदयद्रावक आणि अस्वस्थ करणारे दृश्य चित्रित केले जात असताना ही घटना घडली. अभिनेत्री प्रसन्ना बिष्तने एका मुलाखतीत सांगितले की, सेटवर इंटिमसी कोऑर्डिनेटर उपस्थित असूनही आणि सीनची पूर्ण कल्पना असूनही, पहिल्या टेकवेळी सिद्धार्थ अचानक रडायला लागला. तो इतका थरथर कापत होता की दिग्दर्शकांना काही काळ चित्रीकरण थांबवून त्याला सावरण्यासाठी वेळ द्यावा लागला.
सिद्धार्थने सांगितला अस्वस्थ करणारा अनुभव
स्वतः सिद्धार्थने या अनुभवावर भाष्य करताना म्हटले की, "त्या दृश्याचा मानवी भावनेवर इतका खोल परिणाम झाला की मला स्वतःला सावरणे कठीण गेले." जरी कलाकारांनी या सीनसाठी आधी रिहर्सलही केली होती, तरीही कॅमेरा सुरू झाल्यावर पडद्यावरची ती कृती करताना एक माणूस म्हणून तो स्वतःला रोखू शकला नाही. सिद्धार्थच्या मते, तो सीन फक्त अभिनयापुरता मर्यादित न राहता एका भयानक वास्तवाची जाणीव करून देणारा होता, ज्यामुळे त्याची पहिली प्रतिक्रिया रडण्याचीच आली.
धाडसी विषयाचे प्रेक्षकांकडून कौतुक
ज्या विषयावर समाजात आजही बोलायला लोक कचरतात, अशा 'मॅरिटल रेप'वर 'चिरैया'मध्ये अत्यंत प्रभावीपणे भाष्य करण्यात आले आहे. जिओ हॉटस्टारवर उपलब्ध असलेल्या या सिरीजने प्रेक्षकांना अंतर्मुख केले आहे. प्रसन्ना आणि सिद्धार्थ यांच्या दमदार अभिनयामुळे या संवेदनशील विषयाची मांडणी अधिक जिवंत वाटत असल्याचे अनेक समीक्षकांनी म्हटले आहे. एका बाजूला सिरीजमधील दृश्यांची दाहकता अस्वस्थ करत असताना, दुसरीकडे कलाकारांनी घेतलेल्या कष्टांचे कौतुक होत आहे.
