मुंबई: अभिनेता एजाज खानच्या अडचणीत आता दिवसेंदिवस वाढ होत आहे. यापूर्वी 'हाऊस अरेस्ट' नावाच्या शोसाठी एजाज खानविरुद्ध एफआयआर दाखल करण्यात आला होता. या अभिनेत्यावर शोमधून अश्लीलता पसरवल्याचा आरोप आहे. या शोवरील वाद अजून संपलेला नाही आणि आता एजाज खानविरुद्ध आणखी एक तक्रार दाखल करण्यात आली आहे. एजाज खानविरुद्ध मुंबईतील चारकोप पोलिस ठाण्यात बलात्काराचा गुन्हा दाखल करण्यात आला आहे. एका अभिनेत्रीच्या तक्रारीवरून चारकोप पोलिसांनी एजाजविरुद्ध बलात्काराचा गुन्हा दाखल केला आहे.
पीडित अभिनेत्रीचा एजाज खानवर आरोप –
पीडित अभिनेत्रीच्या तक्रारीनुसार, एजाज खानने तिला त्याच्या हाऊस अरेस्ट शोमध्ये होस्टची भूमिका देण्यासाठी फोन केला होता. शूटिंग सुरू असताना, एजाज खानने प्रथम पीडितेला प्रपोज केले आणि नंतर तिचा धर्म स्वीकारून तिच्याशी लग्न करण्याचे आश्वासन दिले. यानंतर अभिनेत्याने पीडित अभिनेत्रीच्या इच्छेविरुद्ध जाऊन तिच्यावर बलात्कार केला. त्यानंतर पीडित अभिनेत्रीने रविवारी संध्याकाळी चारकोप पोलिस ठाण्यात याप्रकरणी तक्रार दाखल केली.
हेही वाचा – विराट कोहलीच्या एका लाईकमुळे अवनीत कौरचे नशीब उजळले! इंस्टाग्राम फॉलोअर्समध्ये 20 लाखांची वाढ
एजाज खानविरुद्ध बलात्कारचा गुन्हा दाखल –
दरम्यान, एजाज खानविरुद्ध बलात्काराशी संबंधित भारतीय दंड संहितेच्या कलमांखाली गुन्हा दाखल करण्यात आला आहे. त्याच्याविरुद्ध चारकोप पोलिस ठाण्यात बीएनएसच्या कलम 64, 64(2 एम), 69, 74 अंतर्गत बलात्काराचा गुन्हा दाखल करण्यात आला. सध्या या प्रकरणाची चौकशी सुरू आहे.
हेही वाचा – वन्यजीव संरक्षण कायद्याचा भंग? छाया कदम यांच्या विरोधात तक्रार दाखल
'हाऊस अरेस्ट' शो प्रकरणात एजाज खानवर गुन्हा दाखल –
तथापि, एजाज खानचा वादांशी दीर्घकाळ संबंध आहे. सध्या तो त्याच्या 'हाऊस अरेस्ट' शोमुळे चर्चेत आहे. उल्लू अॅपवरील शो 'हाऊस अरेस्ट'ला अश्लील म्हणत अनेक राजकीय संघटनांनी त्याविरुद्ध आवाज उठवला. या शो विरोधात सरकारकडून कारवाई करण्याची मागणी जोर धरू लागली. त्यानंतर एजाज खान आणि उल्लू अॅपच्या सीईओंविरुद्धही एफआयआर दाखल करण्यात आला आहे. या एफआयआरनंतर, उल्लू अॅपवरून हाऊस अरेस्टचे सर्व भाग काढून टाकण्यात आले आहेत.
