PAN Card New Rules: जर तुम्ही स्वतःसाठी किंवा कुटुंबातील सदस्यासाठी नवीन पॅन कार्ड बनवण्याचा विचार करत असाल तर ही बातमी नक्की वाचा. पॅन कार्ड काढण्यासाठी तुमच्याकडे आधार असणे आवश्यक आहे. केंद्रीय प्रत्यक्ष कर मंडळाने (CBDT) नवीन नियम लागू केला आहे. याअंतर्गत, 1 जुलैपासून नवीन स्थायी खाते क्रमांक (PAN) कार्डसाठी आधार क्रमांक आणि आधार पडताळणी आवश्यक असेल. आतापर्यंत पॅन कार्ड बनवण्यासाठी आधार आवश्यक नव्हता. यासाठी कोणतेही वैध ओळखपत्र आणि जन्म प्रमाणपत्र पुरेसे होते. परंतु नवीन नियमानुसार, आता आधार अनिवार्य करण्यात आला आहे.
हेही वाचा – एअर इंडियाची फ्लाइट रद्द झाल्यास 'अशा' प्रकारे मिळवा तिकिटाचे पैसे
आधार-आधारित पडताळणीचे हे पाऊल डिजिटलायझेशनला प्रोत्साहन देण्यासाठी आणि कर भरताना जबाबदारी आणि अनुपालन सुनिश्चित करण्यासाठी उचलण्यात आले आहे. यामुळे करचोरी रोखण्यास मदत होईल. तसेच, उत्पन्न लपवणाऱ्यांवर कठोर कारवाई करता येईल. विद्यमान पॅन कार्ड धारकांसाठी, आधार पॅनशी लिंक करण्याची शेवटची तारीख 31 डिसेंबर 2025 आहे. पुढील वर्षापासून आधारशी लिंक नसलेले पॅन निष्क्रिय केले जाईल.
हेही वाचा – 15 ऑगस्टपासून बदलणार फास्टॅगसंदर्भातील नियम! वर्षाच्या पाससाठी लागणार 'इतके' पैसे
दरम्यान, पॅन कार्ड बनवण्यासाठी आधार अनिवार्य केल्याने बनावट पॅन कार्ड थांबतील. आताही अनेक फसवणूक करणारे बनावट पॅन कार्ड बनवून चुकीचे काम करत आहेत. आता आधार बायोमेट्रिकमुळे हे सर्व शक्य होणार नाही. आयकर विभागाच्या मते, कोणत्याही व्यक्तीला एकापेक्षा जास्त पॅन कार्ड ठेवण्याची परवानगी नाही.
