Mobile Recharge: भारतातील मोबाईल वापरकर्त्यांना लवकरच आपल्या खिशाला आणखी कात्री लावावी लागणार आहे, कारण आगामी काळात मोबाईल रिचार्जच्या दरांमध्ये मोठी वाढ होण्याचे संकेत मिळाले आहेत. 'सेंट्रम इन्स्टिट्यूशनल रिसर्च'ने प्रसिद्ध केलेल्या ताज्या अहवालानुसार, पुढील 3 ते 4 महिन्यांत दूरसंचार कंपन्या आपल्या प्लॅन्सच्या किमती 12 ते 15 टक्क्यांनी वाढवू शकतात. या अहवालात प्रामुख्याने रिलायन्स जिओ आणि भारती एअरटेलच्या ग्राहकसंख्येत सातत्याने होणारी वाढ, तसेच व्होडाफोन आयडियाकडून केल्या जाणाऱ्या 5G नेटवर्कच्या विस्ताराचा प्रामुख्याने उल्लेख करण्यात आला आहे.
तुमच्या खिशावर कसा होणार परिणाम? पाहा संभाव्य आकडेवारी
दूरसंचार कंपन्यांनी जर कमाल 15 टक्क्यांपर्यंत दरवाढ लागू केली, तर सध्या उपलब्ध असलेल्या विविध प्लॅन्सच्या किमती लक्षणीयरीत्या बदलतील. उदाहरणार्थ, सध्या मिळणारा 199 रुपयांचा मूलभूत रिचार्ज प्लॅन थेट 229 रुपयांच्या घरात पोहोचेल. नियमित वापरासाठी लोकप्रिय असलेला 299 रुपयांचा डेटा प्लॅन महागून सुमारे 344 ते 359 रुपयांपर्यंत जाण्याची शक्यता आहे. याशिवाय, ग्राहकांचा दीर्घकालीन 999 रुपयांचा प्लॅन आता थेट 1,149 रुपयांना मिळू शकेल. म्हणजेच, नजीकच्या भविष्यात सर्वच श्रेणीतील रिचार्जसाठी ग्राहकांना जादा पैसे मोजावे लागतील.
दरवाढीमागील नेमके कारण काय?
देशातील आघाडीच्या टेलिकॉम कंपन्या, विशेषतः रिलायन्स जिओ आणि भारती एअरटेल, सध्या देशभरात आपल्या 5G पायाभूत सुविधांचे जाळे मजबूत करण्यासाठी प्रचंड मोठी आर्थिक गुंतवणूक करत आहेत. या भांडवली खर्चाचा भार अंशतः ग्राहकांवर टाकून महसूल गोळा करण्याचा कंपन्यांचा मानस आहे. यासोबतच, प्रत्येक सक्रिय ग्राहकाकडून मिळणारा सरासरी महसूल म्हणजेच 'प्रति वापरकर्ता सरासरी महसूल' (ARPU) वाढवणे हे कंपन्यांचे मुख्य उद्दिष्ट आहे. सध्या भारतीय बाजारपेठेत जिओ आणि एअरटेलचे प्रचंड वर्चस्व असल्याने आणि स्पर्धा मर्यादित असल्याने या कंपन्या सहजपणे दरवाढीचा निर्णय घेऊ शकत आहेत.
