Oil Tanker Attack: ओमानच्या समुद्रकिनाऱ्यालगत असलेल्या आणि जागतिक व्यापारासाठी अत्यंत संवेदनशील मानल्या जाणाऱ्या हॉर्मुझच्या सामुद्रधुनी भागात एका तेल टँकरवर मंगळवारी पहाटेच्या सुमारास प्रोजेक्टाइलने हल्ला केला. या हल्ल्यामुळे जहाजाला तात्काळ आग लागली असून, युनायटेड किंगडमच्या सागरी देखरेख संस्थेने (UKMTO) या वृत्ताला दुजोरा दिला आहे. इराणचे सर्वोच्च नेते अयातुल्ला अली खामेनी यांच्या अंत्यसंस्काराची प्रक्रिया सुरू असतानाच हा हल्ला झाल्याने या सागरी क्षेत्रातील लष्करी आणि राजकीय तणाव आणखी वाढला आहे.
इशारे झुगारल्यामुळेच कारवाई; इराणचे स्पष्टीकरण
या हल्ल्यानंतर आंतरराष्ट्रीय समुदायाकडून इराणकडे संशयाची सुई वळली असता, इराणच्या सरकारी प्रसारमाध्यमांनी एक अधिकृत निवेदन प्रसिद्ध केले आहे. या टँकरने सागरी सुरक्षेचे नियम आणि दिलेले इशारे पूर्णपणे धुडकावले होते, असा दावा इराणने केला आहे. ओमानच्या किनारपट्टीवरून प्रवास करणाऱ्या जहाजांना लक्ष्य केल्याचा आरोप इराणवर आधीपासूनच होत आला आहे. काही दिवसांपूर्वीच इराणने सर्व जहाजांना केवळ स्वतः निर्धारित केलेल्या सागरी मार्गांचाच वापर करण्याचा कडक इशारा दिला होता. जागतिक तेल आणि नैसर्गिक वायूच्या एकूण व्यापारापैकी जवळपास 1/5 भाग याच हॉर्मुझच्या सामुद्रधुनीतून होतो, ज्यामुळे हा मार्ग अत्यंत महत्त्वाचा मानला जातो.
अमेरिका आणि इराणमधील संवाद थांबला; ट्रम्प यांचा इशारा
दुसरीकडे, इराण आणि अमेरिका यांच्यातील राजनैतिक चर्चा सध्या पूर्णपणे ठप्प झाली आहे. खामेनी यांच्यावर अंत्यसंस्कार पार पडल्यानंतरच ही प्रक्रिया पुढे सरकू शकते असा अंदाज आहे. या अंत्यसंस्कारादरम्यान उपस्थित जनसमुदायाकडून अमेरिकेचे राष्ट्राध्यक्ष डोनाल्ड ट्रम्प यांच्या विरोधात तीव्र घोषणाबाजी करण्यात आली. दरम्यान, ट्रम्प यांनी अंत्यसंस्काराच्या काळात इराणवर कोणतीही लष्करी कारवाई न करण्याचे आश्वासन दिले होते. मात्र, त्यांनी इराणसमोर दोनच पर्याय ठेवले असून, एकतर दोन्ही देशांमध्ये करार होईल किंवा अमेरिका थेट लष्करी बळाचा वापर करून हे काम पूर्ण करेल, असा सज्जड दमही दिला आहे.
ओमानच्या 'लिमा' क्षेत्राजवळ जहाजाला लागली आग
UKMTO च्या अहवालानुसार, हा हल्ला ओमानच्या 'लिमा' सागरी क्षेत्राजवळ घडला. हे तेलवाहू जहाज हॉर्मुझच्या सामुद्रधुनी पार करून दक्षिणेकडील 'गल्फ ऑफ ओमान'च्या दिशेने प्रवास करत असताना, त्याच्या डाव्या बाजूला एका अज्ञात प्रोजेक्टाइलने धडक दिली. या धडकेनंतर जहाजावर आग भडकली. सुदैवाने, या दुर्घटनेमुळे सागरी पर्यावरणाला किंवा जलचरांना कोणतीही हानी पोहोचलेली नाही आणि या प्रकरणाचा सखोल तपास सुरू आहे. गेल्या गुरुवारीच इराणच्या संयुक्त लष्करी कमांडने स्पष्ट केले होते की, या मार्गावरून जाणाऱ्या सर्व तेल टँकर्सनी केवळ इराणच्याच मार्गदर्शक तत्त्वांचे पालन करणे बंधनकारक राहील.
