Adani Total Gas Price Cut: पश्चिम आशियातील युद्धजन्य परिस्थितीमुळे इंधन पुरवठ्यात अडथळे निर्माण झालेले असतानाच, अदानी टोटल गॅस लिमिटेडने (ATGL) आपल्या औद्योगिक ग्राहकांसाठी आनंदाची बातमी दिली आहे. कंपनीने औद्योगिक वापरासाठी लागणाऱ्या अतिरिक्त नैसर्गिक वायूच्या (Additional Natural Gas) किमतीत लक्षणीय कपात करण्याची घोषणा केली असून, नवीन दर 16 मार्च 2026 रोजी सकाळी 6 वाजेपासून अमलात येणार आहेत.
नेमकी किती झाली कपात?
अदानी टोटल गॅसने आपल्या निवेदनात स्पष्ट केले आहे की, अतिरिक्त गॅसचा दर आता 119.90 रुपये प्रति स्टँडर्ड क्यूबिक मीटर (SCM) वरून थेट 82.95 रुपये इतका कमी करण्यात आला आहे. आंतरराष्ट्रीय बाजारात अपस्ट्रीम गॅसच्या किमतीत झालेली घट आणि पुरवठा साखळीतील सुधारणा यांचा फायदा थेट ग्राहकांपर्यंत पोहोचवण्यासाठी हा निर्णय घेण्यात आला आहे.
का घेतला हा निर्णय?
पश्चिम आशियातील तणावामुळे 'हॉर्मुझ सामुद्रधुनी'तून होणारी जहाजांची वाहतूक बाधित झाली होती. याचा थेट परिणाम भारताच्या एलएनजी (LNG) पुरवठ्यावर झाला होता. या संकटकाळात कंपनीने औद्योगिक ग्राहकांना गॅसचा वापर 40 टक्क्यांपर्यंत कमी करण्याचे आवाहन केले होते. या मर्यादेपेक्षा जास्त वापरल्या जाणाऱ्या गॅसवर वाढीव दर लावले जात होते. आता अपस्ट्रीम दरात घट झाल्यामुळे आणि सरकारी स्तरावर गॅस वाटपाच्या रचनेत बदल झाल्यामुळे, ग्राहकांवरील आर्थिक भार कमी करण्यासाठी ही सुधारणा करण्यात आली आहे.
घरगुती ग्राहकांनाही दिलासा
महत्त्वाची बाब म्हणजे, चालू महिन्याच्या सुरुवातीला ATGL ने सीएनजी (CNG) आणि घरातील पाइप्ड कुकिंग गॅस (PNG) च्या किमती स्थिर ठेवल्या होत्या. आता औद्योगिक दरात कपात केल्यामुळे उत्पादन खर्चातही काही प्रमाणात घट होण्याची शक्यता आहे. मात्र, 80 टक्के गॅस पुरवठ्याबाबत अधिक माहितीसाठी ग्राहकांनी 'गेल' (GAIL India Ltd) कडे चौकशी करावी, असेही कंपनीने सूचित केले आहे. इंधन संकटाच्या काळात सिस्टिमची स्थिरता राखणे आणि ग्राहकांना स्वस्त दरात गॅस उपलब्ध करून देणे, हा या निर्णयाचा मुख्य उद्देश असल्याचे कंपनीने म्हटले आहे.
