Karanvir Bohra Divorce : प्रसिद्ध टीव्ही अभिनेता करणवीर बोहरा आणि त्याची पत्नी टीजे सिद्धू यांच्या वैवाहिक आयुष्यात सर्व काही ठीक चालले नसल्याच्या चर्चा गेल्या काही महिन्यांपासून सोशल मीडियावर जोर धरत आहेत. यावर अखेर अभिनेत्याने आपले मौन सोडले आहे. एका विशेष मुलाखतीत बोलताना करणवीरने स्पष्ट केले की, त्याला आपल्या वैयक्तिक आयुष्यावर कोणतेही भाष्य करायचे नाही. 'जेव्हा मला एखाद्या विषयावर चर्चा करायची नसते, तेव्हा मी अत्यंत आदराने तसे सांगतो आणि लोकांनीही माझ्या या खासगी जीवनाचा आदर करावा अशी माझी अपेक्षा आहे,' असे आवाहन त्याने लोकांना केले आहे.
सोशल मीडियावरील अनफॉलोमुळे रंगल्या चर्चा
करणवीर आणि टीजे सिद्धू यांनी गेल्या सुमारे 2 वर्षांपासून एकत्र पोस्ट शेअर करणे बंद केले होते. तसेच करणवीरने टीजेला इंस्टाग्रामवर अनफॉलो केल्याचे नेटकऱ्यांच्या लक्षात आल्यावर या सेपरेशनच्या बातम्यांना अधिक उधाण आले. याशिवाय, काही काळापूर्वी करणवीरच्या वडिलांचे निधन झाले तेव्हाही टीजे मुंबईत उपस्थित नव्हती. सोशल मीडियावरील ट्रोलिंगबद्दल बोलताना अभिनेता म्हणाला की, युजर्सच्या कमेंट्सचा त्याच्यावर काहीही परिणाम होत नाही आणि तो अशा गोष्टींमुळे अजिबात दुखावला जात नाही.
20 वर्षांचा संसार आणि 3 मुली
करणवीर आणि टीजे सिद्धू यांचे लग्न 2006 मध्ये झाले असून त्यांच्या लग्नाला जवळपास 20 वर्षे पूर्ण झाली आहेत. या दांपत्याला 3 अतिशय गोंडस मुली आहेत, ज्यामध्ये 2016 मध्ये जन्मलेल्या बेला आणि व्हिएना या जुळ्या मुलींचा आणि 2020 मध्ये जन्मलेल्या लहान जियाचा समावेश आहे. मुलींना उत्तम शैक्षणिक वातावरण मिळावे यासाठी टीजे आपल्या मुलींसह कॅनडाला स्थायिक झाली आहे, तर करणवीर आपले काम आणि कुटुंबाचा सांभाळ करण्यासाठी मुंबई आणि कॅनडा या दोन्ही ठिकाणांदरम्यान प्रवास करत असतो.
इंडस्ट्रीतील यशस्वी कारकीर्द
आपल्या 2 दशकांच्या कारकिर्दीत करणवीरने 'कसौटी जिंदगी की', 'शरारत', 'कुबूल है' आणि 'नागिन 2' यांसारख्या प्रचंड गाजलेल्या मालिकांमध्ये महत्त्वाच्या भूमिका साकारल्या आहेत. याशिवाय 'बिग बॉस', 'खतरों के खिलाडी', 'नच बलिये', 'झलक दिखला जा' आणि 'लॉक अप' यांसारख्या लोकप्रिय रिॲलिटी शोमधून तो घराघरांत पोहोचला. केवळ अभिनयापुरते मर्यादित न राहता करणवीरने आता निर्मिती आणि दिग्दर्शन क्षेत्रातही यशस्वी पाऊल ठेवले असून तो स्वतःची प्रोडक्शन कंपनी चालवतो.
