Earthquake In Japan: जपानमध्ये रविवारी संध्याकाळी 6.7 रिश्टर स्केलचा शक्तिशाली भूकंप झाला. या भूकंपाच्या धक्क्याने देश पुन्हा एकदा हादरला आहे. उत्तर जपानच्या इवाते प्रांताच्या किनाऱ्याजवळ हा भूकंप संध्याकाळी 5:03 वाजता (स्थानिक वेळेनुसार) झाला. भूकंपानंतर जपान हवामान संस्थेने एक मीटर उंचीच्या त्सुनामीचा इशारा जारी केला असून, नागरिकांमध्ये भीतीचे वातावरण निर्माण झाले आहे.
हेही वाचा – Andaman Earthquake: अंदमान आणि निकोबार बेटांवर 5.4 तीव्रतेचा भूकंप; लोकांमध्ये भीतीचं वातावरण
भूकंपाचे केंद्रबिंदू समुद्रसपाटीपासून 10 किलोमीटर खोलीवर असल्याचे अधिकाऱ्यांनी सांगितले. इवाते प्रांतातील काही भागात भूकंपाची तीव्रता 4 रिश्टर स्केल इतकी नोंदवली गेली. प्रारंभिक माहितीनुसार, नुकसानाचे प्रमाण अजून स्पष्ट झालेले नाही, मात्र अधिकाऱ्यांनी समुद्रकिनाऱ्याजवळील भागांतील लोकांना सुरक्षित स्थळी हलविण्याचे निर्देश दिले आहेत.
जपान हा ‘रिंग ऑफ फायर’ या भूकंपप्रवण क्षेत्रात असल्याने, तिथे वारंवार भूकंप होत असतात. त्सुनामीच्या धोक्यामुळे जपानमध्ये अत्याधुनिक इशारा प्रणाली आणि समुद्री सेन्सर नेटवर्क कार्यरत आहे. या प्रणालीमुळे संभाव्य त्सुनामीचा अंदाज वर्तवून जलद प्रतिसाद उपाययोजना केली जाते. अधिकाऱ्यांनी नागरिकांना शांत राहण्याचे आणि अधिकृत सूचनांचे पालन करण्याचे आवाहन केले आहे.
