India's Strict Action against Bangladesh : बांगलादेशातील ढाका येथील भारतीय उच्चायोगाला मिळालेल्या धमक्या आणि तेथील नेत्यांनी भारताच्या अखंडतेबद्दल केलेल्या प्रक्षोभक विधानांच्या पार्श्वभूमीवर भारताने आक्रमक पवित्रा घेतला आहे. परराष्ट्र मंत्रालयाने (MEA) बुधवारी बांगलादेशचे उच्चायुक्त रियाज हामिदुल्लाह यांना पाचारण करून आपला तीव्र निषेध नोंदवला. या राजनैतिक तणावाचा थेट परिणाम सामान्य सेवांवरही झाला असून, ढाका येथील भारतीय व्हिसा अर्ज केंद्र बुधवारी दुपारी 2:00 वाजल्यापासून अनिश्चित काळासाठी बंद करण्यात आले आहे.
बांगलादेशी नेत्याची फुटीरतावादी चिथावणी
हा तणाव वाढण्याचे मुख्य कारण नॅशनल सिटिजन पार्टीचे नेते हसनात अब्दुल्ला यांनी दिलेली धमकी आहे. ढाका येथील एका जाहीर सभेत बोलताना त्यांनी भारताच्या 'सेव्हन सिस्टर्स' म्हणजेच अरुणाचल प्रदेश, आसाम, मणिपूर, मेघालय, मिझोरम, नागालँड आणि त्रिपुरा या राज्यांना भारतापासून वेगळे करण्यासाठी मदत करण्याची चिथावणी दिली. "आम्ही भारतविरोधी शक्तींना आश्रय देऊ आणि तुमच्या सात राज्यांना भारतापासून तोडू," असे प्रक्षोभक विधान अब्दुल्ला यांनी केल्यामुळे भारताने बांगलादेश सरकारकडे आपली गंभीर चिंता व्यक्त केली आहे.
सुरक्षेच्या कारणास्तव कर्मचारी कपात
बांगलादेशातील ढाका येथील भारतीय उच्चायोगाच्या सुरक्षेबाबत भारत आधीपासूनच सतर्क आहे. ऑगस्ट 2024 मध्ये बांगलादेशात झालेल्या मोठ्या राजकीय उलथापालथीनंतर भारताने खबरदारीचा उपाय म्हणून आपल्या दूतावासातील अनावश्यक कर्मचारी आणि त्यांच्या कुटुंबीयांना मायदेशी बोलावले होते. आता नव्याने मिळालेल्या धमक्यांमुळे सुरक्षेचे वातावरण अधिकच बिघडले असून, परराष्ट्र मंत्रालयाने उच्चायुक्त रियाज यांना स्पष्ट बजावले आहे की, आपल्या राजनैतिक अधिकाऱ्यांची सुरक्षा ही बांगलादेश सरकारची जबाबदारी आहे.
हेही वाचा – New Cyber Fraud: फोन उचलला पण समोरून शांतता…; Silent Calls म्हणजे सायबर स्कॅमर्सचा नवीन डाव?
आसामच्या मुख्यमंत्र्यांचा पलटवार
बांगलादेशी नेत्याच्या या बेजबाबदार विधानावर आसामचे मुख्यमंत्री हिमंत बिस्वा सरमा यांनी जोरदार टीका केली आहे. ते म्हणाले की, "भारत हा एक अण्वस्त्रधारी महासत्ता असलेला देश असून जगातील चौथी सर्वात मोठी अर्थव्यवस्था आहे. बांगलादेशने अशा प्रकारे भारताचे तुकडे करण्याचा विचार करणेही धाडसाचे आहे." भारताने नेहमीच बांगलादेशाला ईशान्य भारतातील दहशतवादी आणि फुटीरतावादी गटांना आश्रय देऊ नये, अशी विनंती केली आहे, परंतु ताज्या विधानांमुळे जुन्या जखमा पुन्हा ताज्या झाल्या आहेत.
दहशतवादी संघटनांचा धोका
भारत अनेक दशकांपासून आरोप करत आहे की, आसाम आणि त्रिपुरातील बंडखोर संघटना बांगलादेशचा वापर सुरक्षित तळ म्हणून करत आहेत. 1990 आणि 2000 च्या दशकात अनेक दहशतवादी गटांनी बांगलादेशमध्ये आपले तळ उभारले होते. हुजी (HuJI) आणि जमात-उल-मुजाहिदीन बांगलादेश (JMB) सारख्या कट्टरपंथी संघटनांनीही भारताच्या पूर्व भागांत अशांतता पसरवण्याचा प्रयत्न केला आहे. सद्यस्थितीत बांगलादेशातील बदललेले राजकीय वातावरण भारतासाठी चिंतेचा विषय बनले असून, दोन्ही देशांमधील राजनैतिक संबंध कमालीचे ताणले गेले आहेत.
हेही वाचा – Insurance Act Amendment Bill 2025 : विमा क्षेत्रात 100 टक्के परकीय गुंतवणुकीचा मार्ग मोकळा
