Gold Silver Prices Drop Today : सोन्या-चांदीचे दागिने खरेदी करण्याचा विचार करणाऱ्यांसाठी एक अत्यंत आनंदाची आणि दिलासादायक बातमी आहे. आज सराफा बाजार सुरू होताच मौल्यवान धातूंच्या किमतीत प्रचंड घसरण झाल्याचे पाहायला मिळाले. विशेष म्हणजे, सलग दुसऱ्या दिवशी बाजारात ही घसरण कायम राहिल्याने ग्राहकांमध्ये उत्साहाचे वातावरण आहे. या मोठ्या घसरणीमुळे 24 कॅरेट सोन्याचा भाव 10 तोळ्यांमागे (100 ग्रॅम) तब्बल 18,000 रुपयांनी कमी झाला आहे. त्याच वेळी, औद्योगिक क्षेत्रात मोठ्या प्रमाणावर लागणाऱ्या चांदीच्या किमतीतही प्रति किलो 5,000 रुपयांची मोठी कपात नोंदवली गेली आहे.
मुंबई-पुण्यात दर सारखेच; दिल्लीत किंचित महाग
महाराष्ट्रातील प्रमुख शहरे असलेल्या मुंबई आणि पुण्यात आज सोन्याचे भाव अगदी एकाच पातळीवर स्थिरावले आहेत. गुड रिटर्न्सच्या ताज्या आकडेवारीनुसार, मुंबई आणि पुण्यात आज 24 कॅरेट सोन्याचा प्रति ग्रॅम दर 14,013 रुपये, 22 कॅरेटसाठी 12,845 रुपये आणि 18 कॅरेटसाठी 10,510 रुपये इतका सुरू आहे. या दोन्ही शहरांच्या तुलनेत देशाची राजधानी असलेल्या दिल्लीत सोने खरेदी करण्यासाठी ग्राहकांना खिशाला थोडा जास्त चाट लावावा लागेल. दिल्लीमध्ये आज 24 कॅरेट सोन्याचा भाव प्रति ग्रॅम 14,028 रुपये, 22 कॅरेटसाठी 12,860 रुपये आणि 18 कॅरेटसाठी 10,525 रुपये एवढा नोंदवला गेला आहे.
24, 22 आणि 18 कॅरेट सोन्याचे ताजे दर
आजच्या घसरणीनंतर बाजारात सोन्याचे वेगवेगळे दर अतिशय आकर्षक पातळीवर आले आहेत.
– शुद्ध सोन्याचा म्हणजेच 24 कॅरेटचा विचार केला तर 1 तोळ्याचा (10 ग्रॅम) भाव 1,40,180 रुपये झाला असून ८ ग्रॅमसाठी 1,12,104 रुपये मोजावे लागत आहेत.
– सर्वसामान्यांमध्ये दागिने बनवण्यासाठी लोकप्रिय असलेल्या 22 कॅरेट सोन्याचा 10 ग्रॅमचा दर 1,28,450 रुपये आणि 8 ग्रॅमचा दर 1,02,760 रुपये इतका आहे.
– तर, बजेट फ्रेंडली मानल्या जाणाऱ्या 18 कॅरेट सोन्याचा दर 10 ग्रॅमसाठी 1,05,100 रुपये तर 8 ग्रॅमसाठी 84,080 रुपये एवढा खाली आला आहे.
चांदीमध्येही मोठी घसरण; आणखी स्वस्त होण्याची शक्यता
सोन्याच्या पावलावर पाऊल टाकत आज चांदीच्या दरानेही बाजारात मोठी घसरण नोंदवली आहे. 1000 ग्रॅम (1 किलो) चांदी थेट 5,000 रुपयांनी स्वस्त झाल्यामुळे आता 1 किलो चांदीचा दर 2,35,000 रुपये इतका झाला आहे. किरकोळ बाजारात आज 1 ग्रॅम चांदी 235 रुपये, 8 ग्रॅम चांदी 1,880 रुपये आणि 10 ग्रॅम चांदी 2,350 रुपयांना मिळत आहे. सराफा बाजारातील तज्ज्ञांच्या अंदाजानुसार, जागतिक घडामोडींमुळे येत्या काही दिवसांत चांदीच्या किमतीत अजूनही घसरण होण्याची शक्यता नाकारता येत नाही, ज्यामुळे खरेदीदारांना अधिक फायदा होऊ शकतो.
