Donald Trump about Narendra Modi and India : अमेरिकेचे राष्ट्राध्यक्ष डोनाल्ड ट्रम्प यांनी पुन्हा एकदा भारत आणि पंतप्रधान नरेंद्र मोदी यांच्याबद्दल मोठे दावे केले आहेत. ट्रम्प यांनी गुरुवारी व्हाईट हाऊसमध्ये प्रसारमाध्यमांशी संवाद साधताना, भारताने रशियाकडून कच्च्या तेलाची खरेदी मोठ्या प्रमाणावर बंद केल्याचे जाहीरपणे सांगितले. याच पार्श्वभूमीवर त्यांनी पंतप्रधान मोदींचा उल्लेख 'महान व्यक्ती' (Great Person) असा केला आणि त्यांना पुन्हा एकदा 'मित्र' म्हटले.
ट्रम्प यांचा 'टॅरिफ' आणि तेलखरेदीचा दावा
दररोज भारताला कोंडीत पकडण्याचा प्रयत्न करणारे ट्रम्प कधी काय बोलतील आणि काय करतील, सांगता येत नाही, असेच म्हणण्याची वेळ पुन्हा एकदा आली आहे. या वर्षी एप्रिल महिन्यात अमेरिकेने जगभरातील देशांवर वेगवेगळ्या प्रमाणात टॅरिफ (Tariff) लादले होते. भारताबाबत, ट्रम्प यांनी आधी 25 टक्के आणि नंतर त्यात पुन्हा 25 टक्के टॅरिफची भर घातली होती. हे नंतरचे 25 टक्के टॅरिफ भारत रशियाकडून कच्च्या तेलाची खरेदी करत असल्यामुळे लावण्यात आल्याचे ट्रम्प यांनी जाहीर केले होते. भारताने रशियाकडून तेलखरेदी थांबवावी यासाठी अमेरिकेकडून सातत्याने दबाव आणला जात होता. आता मोदींनी रशियाकडून तेलखरेदी थांबवली असल्याचा दावा डोनाल्ड ट्रम्प यांनी केला आहे.
मोदींचे कौतुक आणि भारत दौऱ्याची योजना
ट्रम्प म्हणाले, 'भारताशी व्यापारविषयक चर्चा चांगल्या चालू आहेत. नरेंद्र मोदी माझे मित्र आहेत. आम्ही नेहमी बोलतो. त्यांनी रशियाकडून कच्च्या तेलाची खरेदी बंद केली आहे.' डोनाल्ड ट्रम्प यांनी पंतप्रधान मोदींवर विश्वास व्यक्त करत त्यांचे कौतुक केले.
तरीही, या वक्तव्यांमुळे भारत-अमेरिका संबंध पुन्हा सुरळीत होतील का, यावर लगेच काही मत व्यक्त करणे घाईचे ठरू शकते.
ट्रम्प यांचा आगामी भारत दौरा : "मी भारतात जावं, अशी मोदींची इच्छा आहे. हे कसं करायचं ते आम्ही ठरवू. मी भारतात जाईन. पंतप्रधान नरेंद्र मोदी एक महान व्यक्ती आहेत. मी त्यांना भेटायला पुढच्या वर्षी भारत दौऱ्यावर जाईन," असेही ट्रम्प यांनी स्पष्ट केले.
यापूर्वी ट्रम्प यांनी भारत-पाकिस्तान संघर्षात मध्यस्थी केल्याचा दावा केला होता. तसेच, या वर्षाच्या अखेरपर्यंत रशियाकडून तेल खरेदी जवळपास शून्यापर्यंत आणली जाईल, असे वचन मोदींनी आपल्याला दिल्याचा दावाही त्यांनी गेल्या महिन्यात केला होता. शिवाय, टॅरिफ आणि निर्बंधांच्या धमक्याही वारंवार देणे ट्रम्प यांच्याकडून सुरूच आहे.
हेही वाचा – Elon Musk: एलन मस्क ‘ट्रिलियनियर’ होणार!, टेस्ला भागधारकांचा मस्क यांना पाठिंबा
