Dhurandhar 2 Advance Booking : आदित्य धर दिग्दर्शित 'धुरंधर 2: द रिव्हेंज' या जासूसी थ्रिलर चित्रपटाने प्रदर्शनापूर्वीच बॉक्स ऑफिसवर वादळ निर्माण केले आहे. नियमित बुकिंग अजून पूर्णपणे सुरू झाले नसतानाही, केवळ प्रीव्ह्यू शो आणि परदेशातील ॲडव्हान्स बुकिंगच्या जोरावर चित्रपटाने 60 कोटी रुपयांचा टप्पा ओलांडला आहे. रणवीर सिंहची मुख्य भूमिका असलेला हा चित्रपट पुन्हा एकदा भारतीय सिनेमाचे सर्व रेकॉर्ड मोडण्यासाठी सज्ज झाला आहे.
भारतातील प्रीव्ह्यू शोला उदंड प्रतिसाद
चित्रपट प्रदर्शित व्हायला अजून 6 दिवस बाकी असून भारतातील नियमित शोचे बुकिंग अजून सुरू झालेले नाही. मात्र, देशभरातील प्रीमियर किंवा प्रीव्ह्यू शोसाठी आतापर्यंत 45 लाख पेक्षा जास्त तिकीटांची विक्री झाली आहे. 13 मार्चच्या सकाळपर्यंत मिळालेल्या आकडेवारीनुसार, भारतात 4.7 लाख तिकीटे विकली गेली असून त्यातून 24.4 कोटी रुपयांची कमाई झाली आहे. पवन कल्याणच्या 'OG' चित्रपटाने बनवलेला 25 कोटींच्या प्रीमियर कमाईचा विक्रम 'धुरंधर 2' मोडीत काढण्याच्या मार्गावर आहे.
परदेशात रणवीर सिंहची जादू
केवळ भारतातच नाही, तर उत्तर अमेरिका, कॅनडा आणि युरोपमध्येही या चित्रपटाची क्रेझ पाहायला मिळत आहे. उत्तर अमेरिकेत ओपनिंग वीकेंडसाठी 3 दशलक्ष डॉलर्सची कमाई झाली असून, त्यापैकी 1 दशलक्ष डॉलर्स केवळ प्रीमियरमधून आले आहेत. युरोप, आशिया आणि ओशनिया या क्षेत्रांतूनही चित्रपटाने ॲडव्हान्स बुकिंगद्वारे 1 दशलक्ष डॉलर्स जमा केले आहेत. अशा प्रकारे जागतिक स्तरावर चित्रपटाने प्रदर्शनापूर्वीच 60 कोटी रुपयांचा गल्ला जमवला आहे. येत्या 1-2 दिवसांत भारतात नियमित बुकिंग सुरू झाल्यावर हा आकडा 100 कोटींच्या पार जाण्याची शक्यता आहे.
पहिल्या भागाची पुन्हा एकदा सिनेमागृहात एन्ट्री
'धुरंधर'च्या पहिल्या भागाने जागतिक स्तरावर 1300 कोटी रुपयांची अवाढव्य कमाई केली होती. आता सीक्वलच्या प्रदर्शनापूर्वी हा पहिला भाग पुन्हा एकदा जगभरातील 500 सिनेमागृहात (ज्यात भारतातील 250 चित्रपटगृहांचा समावेश आहे) प्रदर्शित करण्यात आला आहे. सीक्वलबद्दल प्रेक्षकांमध्ये असलेली उत्सुकता वाढवण्यासाठी ही बॉलीवूडमधील आतापर्यंतची सर्वात मोठी री-रिलीज मानली जात आहे. यामुळे जुन्या चाहत्यांना पुन्हा एकदा धुरंधरचा थरार अनुभवता येत आहे.
तगडी स्टारकास्ट आणि खास कॅमिओ
'धुरंधर 2' मध्ये रणवीर सिंहसोबत आर. माधवन, अर्जुन रामपाल, संजय दत्त आणि सारा अर्जुन हे कलाकार पुन्हा एकदा महत्त्वाच्या भूमिकेत दिसणार आहेत. विशेष म्हणजे, पहिल्या भागात 'रहमान डकैत' ही खलनायकाची भूमिका साकारणारा अक्षय खन्ना या भागात कॅमिओ भूमिकेत दिसणार आहे. तसेच यामी गौतम देखील चित्रपटात झळकणार असल्याची चर्चा आहे. हा चित्रपट 19 मार्च 2026 रोजी जगभरातील सिनेमागृहात प्रदर्शित होणार आहे.
