Gaza Ceasefire: गाझामधील दोन वर्षांपासून सुरू असलेला संघर्ष आज दुपारी एका युद्धबंदी करारामुळे थांबवला गेला. अमेरिकेचे अध्यक्ष डोनाल्ड ट्रम्प यांच्या 20-कलमी प्रस्तावावर आधारित हा करार गाझामध्ये स्थानिक वेळेनुसार दुपारी लागू झाला, अशी माहिती इस्रायली सैन्याने दिली आहे. दरम्यान, 7 ऑक्टोबर 2023 पासून इस्रायल आणि हमासमध्ये संघर्ष सुरू होता. या काळात दोन्ही बाजूंनी हजारो नागरिक प्रभावित झाले आहेत, ज्यामध्ये मोठी नागरी जीवितहानी आणि मालमत्तेचे नुकसान झाले आहे. युद्धबंदी लागू होण्यापूर्वीही, उत्तर गाझामध्ये पॅलेस्टिनींनी जोरदार गोळीबार केला होता.
इस्रायली सैन्याची गाझामधून माघार
युद्धबंदी जाहीर झाल्यानंतर इस्रायली सैन्याने गाझामधून माघार घेण्यास सुरुवात केली आहे. तथापि, कराराच्या अटी आणि अंमलबजावणीची तपशीलवार माहिती अद्याप स्पष्ट नाही. काही अहवालांमध्ये असेही सांगितले जात आहे की, युद्धबंदी असूनही गाझामध्ये बॉम्बहल्ले आणि हवाई हल्ले सुरू आहेत, ज्यामुळे प्रदेशातील तणाव वाढू शकतो.
ओलिसांच्या सुटकेसाठी करार
कराराच्या अंमलबजावणीसाठी, दोन्ही बाजूंनी इस्रायली ओलिस आणि पॅलेस्टिनी कैद्यांना परस्पर सोडण्याची सहमती दर्शवली आहे. इस्रायली सैन्याने म्हटले आहे की ते युद्धबंदी कराराच्या सर्व अटींचे पालन करतील. या करारामुळे परिस्थिती शांत होईल अशी अपेक्षा व्यक्त केली आहे.
दरम्यान, राजकीय तज्ञांचा असा विश्वास आहे की हा करार तात्पुरता असू शकतो आणि खऱ्या अर्थाने कायमस्वरूपी शांततेसाठी दोन्ही बाजूंमध्ये पुढील संवाद आवश्यक आहे. करार किती काटेकोरपणे अंमलात आणला जातो आणि यामुळे दोन्ही देशांमध्ये स्थायी शांततेचा मार्ग मोकळा होतो की नाही? हे पाहणे महत्त्वाचे ठरणार आहे.
