Smart Driving Tips : गाडी चालवताना खिडकी उघडी ठेवून प्रवास करावा की AC सुरू ठेवावा, हा वाद नेहमीच रंगलेला असतो. वाढत्या इंधन दरांच्या काळात प्रत्येक चालकाला जास्तीत जास्त मायलेज हवे असते. मात्र, अनेकांचा असा समज असतो की AC लावल्यामुळे इंजिनवर ताण पडतो आणि पेट्रोल जास्त खर्च होते. वास्तवात, हे सर्व तुमच्या गाडीच्या वेगावर अवलंबून असते. चुकीच्या वेगाला घेतलेला चुकीचा निर्णय तुमच्या खिशाला भारी पडू शकतो.
शहरातील ड्रायव्हिंग: जेव्हा खिडकी उघडणे ठरते स्मार्ट
जेव्हा तुम्ही शहराच्या ट्रॅफिकमध्ये असता किंवा तुमची गाडी 30 ते 40 किलोमीटर प्रति तास या कमी वेगाने चालत असते, तेव्हा खिडक्या उघड्या ठेवणे हा एक शहाणपणाचा निर्णय ठरतो. या कमी वेगाला हवेचा दाब, ज्याला तांत्रिक भाषेत 'एअर ड्रॅग' (Air Drag) म्हणतात, तो खूप कमी असतो. अशा वेळी AC सुरू ठेवल्यास इंजिनला कॉम्प्रेसर चालवण्यासाठी अतिरिक्त शक्ती लावावी लागते, ज्यामुळे इंधनाचा वापर वाढतो. त्यामुळे जर हवामान सुखावह असेल आणि वेग कमी असेल, तर AC बंद ठेवून खिडक्या खाली करणे तुमच्या फायद्याचे ठरेल.
हायवेवर खिडकी उघडणे पडेल खिशाला महाग
जसजसा गाडीचा वेग वाढतो आणि तुम्ही हायवेवर 60 ते 80 किलोमीटर प्रति तास या वेगाच्या वर जाता, तेव्हा संपूर्ण चित्र पालटते. हायस्पीडवर गाडीला हवा चिरत पुढे जावे लागते. जर यावेळी खिडक्या उघड्या असतील, तर बाहेरची हवा वेगाने आत शिरते आणि गाडीला मागे खेचते, ज्याला 'ड्रॅग इफेक्ट' म्हणतात. हे एखाद्या उघड्या पॅराशूटसारखे काम करते. हा हवेचा अडथळा दूर करून वेग कायम ठेवण्यासाठी इंजिनला खूप जास्त ताकद लावावी लागते, परिणामी इंधनाचा वापर AC चालवण्यापेक्षाही जास्त होतो.
हेही वाचा – Yamaha Tricity 300: आता स्कूटरलाही एअरबॅग! यामाहाने लाँच केली जगातील पहिली हटके स्कूटर; पाहा भन्नाट फीचर्स
छत्रीचे उदाहरण आणि एरोडायनॅमिक्स
हे विज्ञान समजून घेण्यासाठी एका धावपटूचे उदाहरण घेता येईल. जर एखादा माणूस हातात उघडी छत्री घेऊन धावत असेल आणि त्याचा वेग कमी असेल, तर त्याला फारसा त्रास होणार नाही. मात्र, त्याने वेग वाढवण्याचा प्रयत्न केला तर तोच उघडी छत्री त्याला मागे खेचेल आणि तो लवकर थकेल. कारच्या बाबतीतही हेच घडते. उघड्या खिडक्या हायस्पीडला उघड्या छत्रीसारखे काम करतात, ज्यामुळे तुमचे पेट्रोल वेगाने संपते. म्हणूनच हायवेवर AC सुरू ठेवून खिडक्या बंद ठेवणे हे इंधन बचतीसाठी सर्वोत्तम मानले जाते.
मायलेज वाढवण्यासाठी स्मार्ट टिप्स
केवळ खिडकी किंवा AC वर अवलंबून न राहता मायलेज सुधारण्यासाठी काही इतर गोष्टींचीही काळजी घेणे आवश्यक आहे:
– टायर प्रेशर: टायर्समध्ये हवेचा दाब योग्य ठेवा, ज्यामुळे इंजिनवर कमी ताण पडतो.
– स्मूद ड्रायव्हिंग: अचानक ब्रेक लावणे किंवा वेगाने रेस देणे टाळा, कारण यामुळे इंधन वाया जाते.
– वेगाचा ताळमेळ: शहरात 40 च्या वेगाला खिडकी उघडा आणि हायवेवर 80 च्या वेगाला AC सुरू करा.
– या साध्या नियमांचे पालन केल्यास तुमच्या खिशावरचा भार कमी होईल आणि गाडीचे आयुष्यही वाढेल.
हेही वाचा – Solar AC : आता वीज बिलाचे टेन्शन सोडा! सूर्यप्रकाशावर चालणार तुमचा AC; पाहा किती येईल खर्च आणि काय आहे गणित
