Loan Interest Rate Cut: स्वतःच्या घराचे स्वप्न पाहणाऱ्या नागरिकांसाठी सार्वजनिक क्षेत्रातील बँक ऑफ महाराष्ट्रने एक अत्यंत दिलासादायक निर्णय घेतला आहे. बँकेने आपल्या गृहकर्जाच्या व्याजदरांमध्ये 10 बेसिस पॉईंट्सची (0.10टक्के) कपात करण्याची घोषणा केली आहे. या नव्या निर्णयामुळे आता ग्राहकांना केवळ 7.00 टक्के या अत्यल्प सुरुवातीच्या व्याजदराने गृहकर्ज उपलब्ध होणार आहे. यापूर्वी बँकेचा गृहकर्जाचा दर 7.10 टक्के असा होता.
याशिवाय, चारचाकी वाहन घेणाऱ्यांसाठी देखील बँकेने आकर्षक योजना आणली असून ऑटो लोन आता 7.45 टक्के या स्पर्धात्मक व्याजदराने दिले जात आहे. या विशेष सवलतींमुळे ग्राहकांच्या खांद्यावरील मासिक हप्त्याचा (EMI) भार लक्षणीयरीत्या कमी होण्यास मदत होणार आहे.
प्रक्रिया आणि कागदपत्र शुल्क पूर्णपणे माफ
केवळ व्याजदर कमी करून न थांबता, बँकेने आपल्या ग्राहकांसाठी 'मान्सून धमाका' या विशेष उपक्रमांतर्गत अतिरिक्त आर्थिक फायदे देऊ केले आहेत. या मर्यादित कालावधीच्या ऑफरमध्ये नवीन कर्ज खाते उघडताना लागणारे प्रोसेसिंग फी (प्रक्रिया शुल्क) आणि कागदपत्रांचे शुल्क (डॉक्युमेंटेशन चार्जेस) पूर्णपणे माफ करण्यात आले आहे. यामुळे कर्ज घेताना सुरुवातीला होणारा मोठा खर्च वाचणार असून ग्राहकांना थेट फायदा मिळणार आहे.
चांगला क्रेडिट स्कोअर असलेल्या ग्राहकांनाच मिळणार कमाल फायदा
बँकेने स्पष्ट केले आहे की 7.00 टक्के या सर्वात कमी व्याजदराचा फायदा प्रामुख्याने उत्तम आर्थिक शिस्त असलेल्या पगारदार ग्राहकांनाच मिळेल. यासाठी संबंधित अर्जदाराचा क्रेडिट स्कोअर (CIBIL Score) 800 किंवा त्यापेक्षा जास्त असणे बंधनकारक आहे.
ज्या ग्राहकांचा क्रेडिट स्कोअर 750 ते 799 या दरम्यान असेल, त्यांना 7.25 टक्के या सुरुवातीच्या दराने गृहकर्ज दिले जाईल. त्यामुळे कोणतेही कर्ज घेताना ग्राहकांचा क्रेडिट स्कोअर अत्यंत महत्त्वाची भूमिका बजावतो, हे या योजनेवरून पुन्हा एकदा स्पष्ट झाले आहे.
