पहलगाम: जम्मू आणि काश्मीरमधील पहलगाम येथे झालेल्या दहशतवादी हल्ल्यात 26 भारतीयांचा मृत्यू झाला आहे. या घटनेनंतर, भारत सरकारने कारवाई केली आणि सार्कद्वारे पाकिस्तानी नागरिकांना दिलेले व्हिसा रद्द केले. भारताच्या निर्णयाचे अनुकरण करून, पाकिस्तान सरकारनेही भारतीयांना दिलेले व्हिसा रद्द केले आहेत. अशा परिस्थितीत पाकिस्तानी नागरिकांना देश सोडण्यासाठी 48 तासांचा कालावधी देण्यात आला आहे. दरम्यान, पाकिस्तानी नागरिक पंजाबमधील अमृतसरमधील अटारी-वाघा बॉर्डर क्रॉसिंगद्वारे पाकिस्तानात परत येत आहेत.
वाघा सीमा ओलांडून 287 भारतीय मायदेशात परतले –
आतापर्यंत 191 पाकिस्तानी नागरिक भारतातून पाकिस्तानात गेले आहेत. तर 287 भारतीय पाकिस्तानातून भारतात परतले आहेत. जम्मू-काश्मीरमधील पहलगाम जिल्ह्यात दहशतवाद्यांनी केलेल्या गोळीबारात अलीकडेच 26 जणांचा मृत्यू झाला होता. यानंतर, भारत सरकारने कारवाई करण्यास सुरुवात केली असून परराष्ट्र मंत्रालयाने एक निवेदन जारी केले की, पाकिस्तानी नागरिकांना 48 तासांच्या आत पाकिस्तानात जावे लागेल.
सिंधू पाणी करार रद्द –
भारत सरकारने सिंधू पाणी करार देखील रद्द केला आहे. याशिवाय, पाकिस्तानमधील भारतीय दूतावासाची क्षमताही कमी करण्यात आली आहे. याशिवाय, वाघा-अटारी सीमा देखील बंद करण्यात आली आहे.
हेही वाचा – शिमला करार मोडला तर फायदा कुणाला? भारताला PoK परत घेण्याची संधी मिळेल?
पंतप्रधान मोदींच्या नेतृत्वाखाली बैठक –
पहलगाम हल्ल्यानंतर पंतप्रधान नरेंद्र मोदी यांच्या अध्यक्षतेखाली सुरक्षा मंत्रिमंडळ समितीची (सीसीएस) बैठक बोलावण्यात आली होती, ज्यामध्ये सिंधू पाणी करार रद्द करण्यासंदर्भात निर्णय घेण्यात आला. या बैठकीत अटारी येथील एकात्मिक तपासणी नाका तात्काळ बंद करण्याची घोषणा करण्यात आली. तसेच, जे लोक वैध कागदपत्रांसह पाकिस्तानला गेले आहेत ते 1 मे पूर्वी त्या मार्गाने परत येऊ शकतात. तथापि, परराष्ट्र मंत्रालयाने 24 एप्रिल रोजी एक निवेदन जारी करून म्हटले आहे की, व्हिसा संबंधित हे नियम हिंदू असलेल्या आणि भारतात राहण्यासाठी दीर्घकालीन व्हिसा मिळालेल्या पाकिस्तानी नागरिकांना लागू होणार नाहीत.
