Assam Flood Death toll and Financial Aid: आसाममधील मान्सूनच्या पुराने तीव्र रूप धारण केले असून परिस्थिती अत्यंत चिंताजनक बनली आहे. आसाम राज्य आपत्ती व्यवस्थापन प्राधिकरणाच्या (ASDMA) अहवालानुसार, गेल्या 24 तासांत शिवसागर जिल्ह्यातील नाझिरा महसूल क्षेत्रात आणखी 7 जणांचा मृत्यू झाला आहे. या जीवितहानीमुळे यंदाच्या पुरातील एकूण मृतांची संख्या 75 वर पोहोचली आहे. सध्या राज्यातील शिवसागर, चराईदेव, गोलाघाट, जोरहाट, नगाव, शोणितपूर आणि कामरूप मेट्रोपॉलिटन हे 7 जिल्हे पुराच्या पाण्यात वेढले गेले असून 21 महसूल मंडळांमधील 622 गावे पूर्णपणे प्रभावित झाली आहेत.
मृतांच्या नातेवाईकांना 9 लाखांची सानुग्रह मदत
पुराचे भयानक गांभीर्य लक्षात घेता आसामचे मुख्यमंत्री हिमंता विश्व शर्मा यांनी बाधित कुटुंबांसाठी भरीव आर्थिक मदतीची घोषणा केली आहे. पूरग्रस्तांना दिल्या जाणाऱ्या सानुग्रह अनुदानात वाढ करून ते 9 लाख रुपये करण्यात आले आहे. यामध्ये नियमित 4 लाख रुपयांच्या मदतीसोबतच मुख्यमंत्र्यांच्या मदत निधीतून अतिरिक्त 5 लाख रुपयांचा निधी दिला जाईल. याशिवाय, नियमांमध्ये शिथिलता आणत शवविच्छेदन अहवालाची (Post-mortem report) अट रद्द केली असून मंडळ अधिकाऱ्याचे (Circle Officer) प्रमाणपत्र या भरपाईसाठी पुरेसे मानले जाईल.
45,000 हेक्टरहून अधिक शेतजमीन पाण्याखाली
राज्यातील महापुरामुळे चराईदेव जिल्हा सर्वाधिक बाधित झाला असून तेथील 1.42 लाख लोक बाधित झाले आहेत, त्यापाठोपाठ शिवसागरमधील 97,074 आणि जोरहाटमधील 57,371 नागरिक संकटात आहेत. पुराच्या पाण्यामुळे राज्यातील सुमारे 45,341.98 हेक्टर क्षेत्रातील पिके पाण्याखाली गेली असून शेतीचे अतोनात नुकसान झाले आहे. सध्या विविध भागांत चालवल्या जाणाऱ्या 81 मदत छावण्यांमध्ये 32,477 नागरिकांनी आश्रय घेतला असून 34 मदत साहित्य वाटप केंद्रे रात्रंदिवस कार्यरत आहेत.
बचावकार्य वेगात अन् संपर्क यंत्रणेसाठी विशेष सुविधा
पूरग्रस्तांच्या मदतीसाठी भारतीय सेना, हवाई दल, NDRF, SDRF, अग्निशमन दल आणि स्थानिक स्वयंसेवक यांच्या संयुक्त विद्यमाने बचावकार्य युद्धपातळीवर सुरू आहे. पूरग्रस्त शिवसागर जिल्ह्यात मोबाईल नेटवर्क खंडित होऊ नये म्हणून 'इंट्रा-सर्कल रोमिंग' (ICR) सुविधा 30 जुलैच्या रात्री 11:59 वाजेपर्यंत वाढवण्यात आली आहे. तसेच विस्थापित कुटुंबांतील सुमारे 1 लाख लोकांना घरगुती गरजांसाठी 15,000 रुपयांची तातडीची मदत देण्याचा निर्णयही प्रशासनाने घेतला आहे.
मदत छावण्यांमधील मुलांच्या शिक्षणाची विशेष सोय
पूरग्रस्त परिस्थितीचा लहान मुलांच्या मानसिकतेवर अन् बालपणावर विपरीत परिणाम होऊ नये, यासाठी आसाम सरकारकडून विशेष काळजी घेतली जात आहे. मुख्यमंत्री शर्मा यांनी सोशल मीडियावर मदत छावण्यांमधील मुलांच्या अभ्यासाची आणि खेळाची छायाचित्रे शेअर करत सांगितले की, 'छावण्यांमध्ये मुलांसाठी अनुकूल वातावरण तयार करणे ही आमची प्राथमिकता आहे. शिक्षण खंडित होऊ नये म्हणून त्यांना मोफत पुस्तके, गणवेश अन् आर्थिक मदत दिली जात असून 1 ऑगस्टपासून विद्यार्थ्यांना ही मदत हस्तांतरित केली जाईल.'
हेही वाचा – POK News : रस्त्यावर मृतदेहांचा सडा! पाकव्याप्त काश्मीरमधील आंदोलकांवर लष्कराचा गोळीबार; 30 जणांचा मृत्यू
