Accident in Madhya Pradesh: मध्य प्रदेशातील विदिशा जिल्ह्यात आज एक भीषण अपघात घडला असून 25 विद्यार्थ्यांना घेऊन जाणारी स्कूल बस जोहर गावाजवळील जहोद नदीत उलटली. या दुर्घटनेमुळे परिसरात एकच खळबळ उडाली. अपघातानंतर स्थानिक नागरिक आणि बचाव पथकाच्या मदतीने मुलांना तातडीने बाहेर काढण्यात आले. या घटनेत अनेक विद्यार्थी जखमी झाले असून काहींची प्रकृती गंभीर असल्याची माहिती समोर आली आहे.
विदिशा मेडिकल कॉलेजचे बीएमओ डॉ. नारायण यांनी दिलेल्या माहितीनुसार, दुपारी सुमारे 1.30 वाजता सहा जखमी मुलांना गंभीर अवस्थेत मेडिकल कॉलेजमध्ये दाखल करण्यात आले. बस सकाळी सुमारे 11 वाजण्याच्या सुमारास नदीत कोसळली. दाखल करण्यात आलेल्या सहा मुलांपैकी दोघांच्या डोक्याला गंभीर दुखापत झाली असून त्यांच्यावर सध्या उपचार सुरू आहेत. उर्वरित मुलांची प्रकृती स्थिर आहे, असे त्यांनी सांगितले.
अपघातानंतर घटनास्थळी मोठी गर्दी जमली होती. जखमी मुलांना तातडीने रुग्णालयात हलवण्यात आले. पोलिसांनी घटनास्थळी धाव घेत अपघाताची चौकशी सुरू केली आहे. बस नदीत कशी कोसळली, याबाबत तपास सुरू असून चालकाच्या निष्काळजीपणाची शक्यताही तपासली जात आहे.
हेही वाचा – Ramdas Athawale on Uddhav Thackeray: राज ठाकरेंची साथ उद्धव ठाकरेंना भोवणार; रामदास आठवलेंचा मोठा दावा
दरम्यान, हरियाणातील चरखी दादरी येथेही असाच एक गंभीर अपघात घडल्याची माहिती आहे. दादरी-बिरोहर रस्त्यावर हरियाणा रोडवेज बस आणि खाजगी स्कूल बसची समोरासमोर जोरदार धडक झाली. या अपघातात इयत्ता 11 वीत शिकणाऱ्या एका विद्यार्थ्याचा मृत्यू झाला असून 18 विद्यार्थी जखमी झाले आहेत. जखमी विद्यार्थ्यांना जवळच्या रुग्णालयात दाखल करण्यात आले आहे.
