Flight Cancellations: मध्य-पूर्वेमध्ये सुरू असलेल्या पेचप्रसंगाचा आणि हवाई क्षेत्रावरील निर्बंधांचा भारताच्या आंतरराष्ट्रीय विमान वाहतुकीला मोठा फटका बसला आहे. नागरी विमानन मंत्री राम मोहन नायडू यांनी सोमवारी लोकसभेत यासंदर्भात सविस्तर माहिती दिली. या संघर्षामुळे आतापर्यंत भारतीय विमान कंपन्यांची एकूण 4,335 उड्डाणे रद्द करावी लागली आहेत. विशेषतः इंडिगो (IndiGo) आणि एअर इंडिया (Air India) यांसारख्या मोठ्या कंपन्यांच्या दैनंदिन सेवांवर याचा विपरीत परिणाम झाला आहे. मात्र, इतका तणाव असूनही भारत आणि पश्चिम आशिया दरम्यान अंदाजे 2,19,780 प्रवाशांनी प्रवास केला असल्याचेही त्यांनी नमूद केले.
परदेशी विमान कंपन्यांनाही फटका; सुरक्षेला सर्वोच्च प्राधान्य
संसदेच्या अर्थसंकल्पीय अधिवेशनाच्या सहाव्या दिवशी माहिती देताना मंत्र्यांनी स्पष्ट केले की, केवळ भारतीयच नव्हे तर भारतात येणाऱ्या आणि येथून जाणाऱ्या परदेशी विमान कंपन्यांच्या सुमारे 1,187 उड्डाणांवरही या परिस्थितीचा परिणाम झाला आहे. "आमचे सर्वोच्च प्राधान्य प्रवाशांची सुरक्षा हेच आहे. जर संबंधित प्रदेशातील हवाई क्षेत्र (Airspace) बंद असेल किंवा असुरक्षित असेल, तर तिथे विमान सेवा चालवण्याचा प्रश्नच उद्भवत नाही," असे ठाम प्रतिपादन मंत्र्यांनी यावेळी केले.
तिकीट दरांवर सरकारचे लक्ष; DGCA कडून परिस्थितीचा आढावा
विमानन नियामक संस्था (DGCA) आणि मंत्रालय बाधित देशांमधील अधिकाऱ्यांशी सतत संपर्कात असून आंतरराष्ट्रीय स्तरावर परिस्थितीवर बारकाईने लक्ष ठेवले जात आहे. विमान कंपन्या या संकटाचा फायदा घेऊन प्रवाशांकडून अवाजवी तिकीट दर (Airfares) वसूल करणार नाहीत, याची खात्री करण्यासाठी मंत्रालय विशेष दक्षता घेत आहे. प्रवाशांची गैरसोय टाळण्यासाठी पर्यायी मार्ग आणि सुधारित वेळापत्रकांचा वापर करण्याच्या सूचना विमान कंपन्यांना देण्यात आल्या आहेत.
हेही वाचा – Shivalik LPG Tanker: अखेर 'शिवालिक' LPG टँकर आज हॉर्मुझची सामुद्रधुनी ओलांडणार, मुंद्रा बंदरावर होणार दाखल
प्रवाशांसाठी महत्त्वाची सूचना; विमानतळावर जाण्यापूर्वी स्टेटस तपासा
विमानन मंत्र्यांनी प्रवाशांना खबरदारीचा उपाय म्हणून एक महत्त्वाचा सल्ला दिला आहे. प्रवासाला निघण्यापूर्वी प्रवाशांनी संबंधित विमान कंपनीच्या संकेतस्थळावर किंवा मोबाईल ॲपवर आपल्या उड्डाणाची सद्यस्थिती (Status) पुन्हा एकदा तपासून घ्यावी. हवाई मार्ग पूर्णपणे पूर्ववत होईपर्यंत वेळापत्रकात ऐनवेळी बदल होण्याची शक्यता असल्याने, विमान कंपन्यांशी सतत संपर्कात राहण्याचे आवाहन सरकारने केले आहे.
