Bareilly Mall Lift Accident : एका मॉलमध्ये रविवारी रात्री एक धक्कादायक प्रकार समोर आला. चित्रपट संपवून परतणारे काही प्रेक्षक लिफ्टचा वापर करत असताना अचानक वीज गेली. वीज पुरवठा खंडित झाल्याने महिला आणि लहान मुलांसह एकूण 13 जण दोन मजल्यांच्या मध्येच लिफ्टमध्ये अडकले. अचानक घडलेल्या या प्रसंगामुळे आणि लिफ्टमध्ये हवा खेळती नसल्याने आत असलेल्या लोकांचा जीव गुदमरू लागला. उकाड्यामुळे आणि भीतीपोटी लहान मुले रडू लागल्याने आतमध्ये प्रचंड घबराट पसरली होती.
मॉल प्रशासनाचे अपयश, हेल्पलाइन कुचकामी
लिफ्टमध्ये अडकलेल्या नागरिकांनी तात्काळ मदतीसाठी आत लिहिलेल्या आपत्कालीन हेल्पलाइन क्रमांकावर अनेकदा फोन फिरवला, मात्र मॉल प्रशासनाकडून कोणताही प्रतिसाद मिळाला नाही. ऐन आणीबाणीच्या वेळी मॉलचे सुरक्षा रक्षकही मदतीसाठी वेळेत पोहोचू शकले नाहीत. प्रशासनाचा हा मोठा हलगर्जीपणा पाहून लिफ्टच्या बाहेर थांबलेले नातेवाईक आणि अडकलेले लोक यांच्यामध्ये तीव्र संताप निर्माण झाला होता. आत अडकलेल्या 17 वर्षीय तरुणी शालिनी हिची प्रकृती बिघडली, गुदमरल्यामुळे आणि अति भीतीमुळे ती लिफ्टमध्येच बेशुद्ध पडली. हा प्रकार उत्तर प्रदेशातील बरेली शहरातील सिव्हिल लाइन्स भागात असलेल्या सिटी सेंटर एलए मॉलमध्ये घडला.
अथक प्रयत्नांनंतर 30 मिनिटांनी नागरिकांची सुखरूप सुटका
आपला जीव धोक्यात आल्याचे पाहून लिफ्टमधील लोकांनी स्वतःच दरवाजे जबरदस्तीने उघडण्याचा प्रयत्न सुरू केला. हा गोंधळ पाहून शेवटी बाहेर उपस्थित असलेले इतर नागरिक आणि मॉलचे काही कर्मचारी मदतीसाठी पुढे सरसावले. सर्वांच्या सामूहिक आणि अथक प्रयत्नांमुळे जवळपास 30 मिनिटांनंतर लिफ्टचे दरवाजे उघडण्यात यश आले. लिफ्टमध्ये अडकलेल्या सर्व 13 जणांना सुखरूप बाहेर काढण्यात आले असून बेशुद्ध पडलेल्या 17 वर्षीय तरुणीला तातडीने प्रथमोपचार देण्यात आले, ज्यानंतर तिची प्रकृती स्थिर झाली. या घटनेची माहिती मिळताच पोलिसांनी मॉल गाठून लोकांचे जबाब नोंदवण्यास सुरुवात केली.
तांत्रिक बिघाड की सेन्सर लॉक? पोलिसांकडून तपास सुरू
या संपूर्ण प्रकरणावर बरेलीचे एसपी सिटी मानुष पारीख यांनी माहिती दिली की, घटनेचे वृत्त समजताच तांत्रिक पथकाला घटनास्थळी पाठवून नागरिकांची सुटका करण्यात आली. पोलिसांच्या प्राथमिक तपासणीनुसार आणि सीसीटीव्ही फुटेजच्या निरीक्षणावरून वीज गायब झाल्यामुळे लिफ्टच्या सेन्सर्सनी काम करणे बंद केले होते. सध्या पोलीस या संपूर्ण प्रकरणाची तांत्रिक बाजू तपासून पाहत असून अधिकृत तक्रार दाखल झाल्यानंतर पुढील कायदेशीर कारवाई केली जाईल.
मॉल प्रशासनाचा बचावात्मक दावा
दुसरीकडे मॉल प्रशासनाने या घटनेवर स्वतःचा बचाव करताना एक वेगळा दावा केला आहे. त्यांच्या म्हणण्यानुसार, वीज गेल्यानंतर लगेचच बॅकअप देण्यासाठी जनरेटर सुरू करण्याची प्रक्रिया सुरू होती. परंतु त्याच वेळी लिफ्टच्या आत अडकलेल्या एका व्यक्तीने घाबरून दरवाजावर जोरात लाथ मारली. या प्रहारामुळे लिफ्टची संपूर्ण सेन्सर यंत्रणा अचानक लॉक झाली आणि दरवाजा उघडण्यास उशीर झाला. असे असले तरी रात्री 10 च्या सुमारास घडलेल्या या घटनेने मॉलच्या सुरक्षिततेच्या दाव्यांची पोलखोल केली आहे.
