Crime News: बिहारमधील जमुई शहरात एका स्थानिक शाळेत इयत्ता 10 वीत शिकणाऱ्या अल्पवयीन मुला-मुलीला अडवून त्यांची छेडछाड, छळ आणि विनयभंग केल्याची संतापजनक घटना समोर आली आहे. कोचिंग क्लासवरून परतत असताना काही जणांच्या टोळक्याने या अल्पवयीन मुलांची स्कूटर थांबवली, त्यांना शिवीगाळ केली आणि पळून जाण्याचा प्रयत्न केला असता त्यांचा तीव्र पाठलाग केला. या घटनेचा सविस्तर व्हिडिओ सोशल मीडियावर तुफान व्हायरल झाला असून, संपूर्ण देशभरातून या घटनेचा तीव्र निषेध व्यक्त केला जात आहे.
पर्यटन स्थळावरून परतताना टोळक्याचा हल्ला
हे दोघे अल्पवयीन विद्यार्थी शहरातील ‘मडवा पहाड’ या लोकप्रिय पर्यटन स्थळावर गेले होते. तेथून परतत असताना एका टोळक्याने त्यांना पाहिले आणि त्यांची स्कूटर थांबवून अचानक हल्ला करण्यास सुरुवात केली. या टोळक्यातील एका सदस्याने मोबाईलवर या संपूर्ण घटनेचे शूटिंग केले. व्हिडिओमध्ये एक जण मुलाच्या शर्टची कॉलर पकडून त्याला ओढताना दिसत आहे. मुलाने मुलीच्या मदतीने स्वतःची सुटका करून घेत पळण्याचा प्रयत्न केला असता, टोळक्याने त्यांचा पाठलाग सुरूच ठेवला.
तरुणीची छेडछाड आणि अमानुष छळ
प्रकरणाचे गांभीर्य दाखवणारा व्हिडिओ समोर आला असून, यामध्ये एका व्यक्तीने तरुणीची मान पकडून तिला जबरदस्तीने उचलण्याचा प्रयत्न केला. मुलाने मध्यस्थी करत तिला वाचवण्याचा प्रयत्न केला, मात्र या झटापटीदरम्यान तरुणीशी अत्यंत गैरवर्तन करण्यात आले. ते दोघे स्कूटरवरून पळून जात असतानाही आरोपींनी तरुणीचा हात ओढून त्यांना रोखण्याचा प्रयत्न केला. या सर्व प्रकारानंतर टोळक्याने त्या दोघांना माफी मागायला भाग पाडले. “कृपया आम्हाला जाऊ द्या, आम्ही पुन्हा कधीही इथे येणार नाही,” अशी गयावया करत विनवणी केल्यानंतर अखेर त्या टोळक्याने त्यांना सोडून दिले.
सोशल मीडियावर व्हिडिओ व्हायरल; पोलिसांकडून 3 जणांना अटक
व्हिडिओ सोशल मीडियावर प्रचंड व्हायरल झाल्यानंतर पोलिसांनी या प्रकरणाची गंभीर दखल घेतली. पोलिसांनी पीडित अल्पवयीन मुलांशी संवाद साधून आरोपींबाबत माहिती गोळा केली आणि तपासाची चक्रे वेगाने फिरवली. उपलब्ध ताज्या माहितीनुसार, पोलिसांनी या प्रकरणी 3 आरोपींना अटक केली आहे. पोलीस सध्या या प्रकरणातील इतर आरोपींचा शोध घेत असून व्हिडिओतील सर्व तपशीलांची पडताळणी केली जात आहे.
The video from Jamui, Bihar is deeply disturbing. Two Class 10 students were stopped on a road. Harassed. Humiliated. Molested. A young girl, hands folded, begged to be let go while goons groped her and dragged her away. Who gave these men the right to behave like this? This is… — Rahul Gandhi (@RahulGandhi) September 21, 2026
आरोपींवर POCSO कायद्यांतर्गत खटला चालवा: राहुल गांधी
या धक्कादायक घटनेवर लोकसभेतील विरोधी पक्षनेते राहुल गांधी यांनी तीव्र प्रतिक्रिया व्यक्त केली आहे. 19 सप्टेंबर रोजी घडलेल्या या घटनेतील दोषींवर कठोर कारवाई करण्याची मागणी करत त्यांनी बिहारच्या एनडीए (NDA) सरकारवर निशाणा साधला. “बिहारमधील जमुई येथील व्हिडिओ अत्यंत अस्वस्थ करणारा आहे. ही विकृत आणि पितृसत्ताक मानसिकता आहे. व्हिडिओमधील प्रत्येक आरोपीची ओळख पटवून त्यांच्यावर POCSO कायद्यांतर्गत खटला चालवला गेला पाहिजे आणि त्यांना तात्काळ कडक शिक्षा झाली पाहिजे,” असे आवाहन राहुल गांधी यांनी केले.
