Telangana Karimnagar Couple Arrest for Sextortion : तेलंगणाच्या करीमनगर जिल्ह्यात पोलिसांनी एका धक्कादायक 'सेक्सटॉर्शन' रॅकेटचा पर्दाफाश केला आहे, जिथे एका विवाहित दांपत्याने मागील 3 वर्षांपासून हनीट्रॅपचा काळा बाजार मांडला होता. या टोळीने सोशल मीडियाचा वापर करून आतापर्यंत 100 हून अधिक पुरुषांना आपल्या जाळ्यात ओढल्याचे तपासात समोर आले आहे. ललिता नावाच्या महिलेने इन्स्टाग्राम आणि यूट्यूबच्या माध्यमातून तरुणांशी मैत्री वाढवून त्यांना आपल्या घरी बोलावले, जिथे त्यांच्या नकळत त्यांचे आक्षेपार्ह व्हिडिओ रेकॉर्ड करण्यात आले.
घरातच लपवले होते छुपे कॅमेरे; असा रचला कट
या रॅकेटची कार्यपद्धती अत्यंत भयानक होती. आरोपी महिला ललिता ही पुरुषांना जाळ्यात ओढण्याचे काम करायची; तर, तिचा पती घरात लपवलेल्या कॅमेऱ्यांच्या मदतीने त्यांच्या खाजगी क्षणांचे चित्रीकरण करायचा. एकदा का व्हिडिओ रेकॉर्ड झाला की, त्यानंतर सुरू व्हायचा ब्लॅकमेलिंगचा खेळ. "पैसे द्या, नाहीतर व्हिडिओ तुमच्या कुटुंबाला पाठवू आणि सोशल मीडियावर व्हायरल करू," अशी धमकी देऊन या दांपत्याने अनेक पुरुषांकडून कोट्यवधी रुपयांची खंडणी उकळली.
एका ट्रक मालकाच्या धैर्याने रॅकेट उघड
हे हाय-प्रोफाईल रॅकेट एका ट्रक मालकामुळे उघडकीस आले. या पीडित व्यक्तीकडून आरोपींनी आधीच 13 लाख रुपये उकळले होते; मात्र, तरीही त्यांनी अतिरिक्त 5 लाख रुपयांची मागणी सुरूच ठेवली. वारंवार होणाऱ्या त्रासाला कंटाळून आणि ठार मारण्याच्या धमकीला न घाबरता या मालकाने करीमनगर पोलिसांत धाव घेतली. पोलिसांनी तांत्रिक तपासाच्या आधारे सापळा रचला आणि या जोडप्याला जेरबंद केले.
अवैधपणे मिळालेल्या पैशांतून खरेदी केला 65 लाखांचा भूखंड
ब्लॅकमेलिंगच्या पैशातून या दांपत्याने आपली जीवनशैली पूर्णपणे बदलून टाकली होती. पोलिसांनी दिलेल्या माहितीनुसार, त्यांनी या पैशातून 65 लाख रुपयांचा एक भूखंड आणि सुमारे 10 लाख रुपयांची आलिशान कार खरेदी केली होती. अटक केल्यानंतर पोलिसांनी त्यांच्याकडून अनेक मोबाईल फोन, पेनड्राईव्ह, रोख रक्कम आणि कोरे चेक जप्त केले आहेत. सध्या डिजिटल पुराव्यांच्या मदतीने पोलीस इतर पीडितांचा शोध घेत असून, या दांपत्याला न्यायालयाने पोलीस कोठडी सुनावली आहे.
सायबर सुरक्षा आणि पोलिसांचे आवाहन
या घटनेनंतर करीमनगर पोलिसांनी नागरिकांना सोशल मीडियावर अनोळखी व्यक्तींशी संवाद साधताना काळजी घेण्याचे आवाहन केले आहे. "ज्या कोणाला अशा प्रकारे लक्ष्य केले गेले असेल, त्यांनी न घाबरता पुढे येऊन तक्रार करावी, तुमची ओळख गोपनीय ठेवली जाईल," अशी खात्री पोलिसांनी दिली आहे. डिजिटल युगात 'हनीट्रॅप' ही एक मोठी समस्या बनत असून, अशा गुन्हेगारांपासून वाचण्यासाठी सतर्क राहणे हाच एकमेव पर्याय असल्याचे या घटनेवरून अधोरेखित होते.
हेही वाचा – Crime News : भयंकर! एकाच खोलीत रक्ताच्या थारोळ्यात 5 मृतदेह; 3 पिस्तूलं आणि 5 गोळ्या, सामूहिक कृत्य की..
