Kerala Shocker: अंधश्रद्धेच्या नावाखाली पुन्हा एकदा मानवीयतेला काळिमा फासणारी घटना केरळमध्ये घडली आहे. कोट्टायम जिल्ह्यातील एका गावात काळ्या जादूचा विधी करताना एका महिलेवर क्रूर अत्याचार झाल्याची धक्कादायक बाब उघडकीस आली आहे. या प्रकरणात पोलिसांनी तांत्रिकासह तीन जणांना अटक केली असून आरोपींनी महिलेवर तासन्तास शारीरिक आणि मानसिक छळ केल्याचे समोर आले आहे.
घटनेचा धक्कादायक तपशील
पोलिसांच्या माहितीनुसार, पीडित महिलेच्या प्रियकराने आणि त्याच्या कुटुंबीयांनी “भूतबाधा दूर करण्यासाठी” स्थानिक तांत्रिक शिवदास याला बोलावले होते. तांत्रिकाने महिलेवर कथित काळ्या जादूचा विधी केल्याचे सांगितले जाते. या विधीच्या नावाखाली महिलेवर अमानुष अत्याचार करण्यात आला. तिला दारू पिण्यास, बीडी ओढण्यास आणि तथाकथित “पवित्र राख” पिण्यास भाग पाडण्यात आले. इतकेच नाही तर तिला शारीरिकरित्या जाळल्याचेही आरोप आहेत.
हेही वाचा – Cyber Fraud: तृणमूल खासदार कल्याण बॅनर्जींच्या खात्यातून 55 लाखांची सायबर चोरी! बनावट KYC करून लुटलं
पीडितेने माध्यमांना सांगितले की, “काळ्या जादूचा विधी सकाळी 11 वाजता सुरू झाला आणि रात्रीपर्यंत चालला. शेवटी मी बेशुद्ध पडले.” तिच्या मते, तिच्या शरीरावर ‘मृत नातेवाईकांचा आत्म्या’ असल्याचा दावा करत आरोपींनी तिच्यावर जादूटोणा केला.
तक्रारीनंतर उघडकीस आली संपूर्ण कहाणी
महिलेची मानसिक आणि शारीरिक अवस्था बिघडल्यावर तिच्या वडिलांनी पोलिसांत धाव घेतली. तक्रारीनंतर पोलिसांनी तातडीने गुन्हा नोंदवून चौकशी सुरू केली. तपासात आरोपी तांत्रिक शिवदास (54), महिलेचा प्रियकर अखिल दास (26) आणि त्याचे वडील दास (54) यांना अटक करण्यात आली. घटनेनंतर पळ काढलेल्या शिवदासला पोलिसांनी तिरुवल्ला येथील मुथूर परिसरातून पकडले.
हेही वाचा – Surat Viral Video : तरुण पाया पडला, माफी मागितली तरी 'तो' मारत होता; भोलाभाईचे काळे कारनामे कॅमेरात कैद
मुख्य आरोपीची आई फरार
पोलिसांनी सांगितले की, या विधीचे आयोजन जोडीदाराच्या आईने केले होते. तिच्याच सल्ल्यानुसार तांत्रिकाला बोलावण्यात आले होते. मात्र सध्या ती फरार असून तिचा शोध सुरू आहे. अटक केलेल्या तिघांनाही न्यायालयाने रिमांडवर पाठवले आहे. पोलिसांनी सांगितले की, हा प्रकार काळ्या जादूच्या नावाखाली घडलेला गंभीर गुन्हा आहे. आरोपींवर कठोर कारवाई केली जाईल. या घटनेनंतर केरळमध्ये पुन्हा एकदा अंधश्रद्धेविरोधी कायद्यांची गरज अधोरेखित होत असून, राज्यात संतापाची लाट उसळली आहे.
