देशभरात गाजत असलेल्या NEET UG पेपरफुटी प्रकरणात तपास यंत्रणांच्या हाती धक्कादायक माहिती लागली आहे. केंद्रीय अन्वेषण विभाग (CBI) या प्रकरणाचा तपास करत असून महाराष्ट्रासह उत्तर प्रदेश, हरियाणा आणि राजस्थानपर्यंत या रॅकेटचे धागेदोरे पोहोचल्याचे समोर येत आहे. संशयित आरोपी शुभम खैरनार याच्या माध्यमातून प्रश्नपत्रिका विविध राज्यांमध्ये पोहोचल्याचा संशय व्यक्त केला जात आहे.
सूत्रांकडून मिळालेल्या माहितीनुसार, अधिकृत परीक्षा होण्याच्या काही दिवस आधीच प्रश्नपत्रिका काही व्यक्तींपर्यंत पोहोचली होती. तपासादरम्यान शुभम खैरनारच्या हालचाली संशयास्पद आढळल्या असून तो काही दिवस नाशिकबाहेर असल्याची माहिती समोर आली आहे. या काळात त्याने अनेक राज्यांतील व्यक्तींशी संपर्क साधल्याचा दावा तपास यंत्रणांकडून केला जात आहे.
CBI च्या प्राथमिक तपासात उत्तर प्रदेश आणि हरियाणा येथील काही व्यक्तींशी संपर्क झाल्यानंतर प्रश्नपत्रिका राजस्थानमधील सिक्करपर्यंत पोहोचल्याची माहिती मिळाली आहे. तेथून ती इतर राज्यांमध्ये पसरवण्यात आल्याचा संशय आहे. या संपूर्ण नेटवर्कचा तपास सध्या विविध तांत्रिक पुराव्यांच्या आधारे केला जात आहे.
या प्रकरणात नाशिक, अहिल्यानगर आणि पुणे हा मार्ग अत्यंत महत्त्वाचा मानला जात आहे. प्रश्नपत्रिकेचा प्रवास आणि ती पुढे कोणाकडे पोहोचली, याचा तपास सुरू आहे. स्थानिक स्तरावर काही मध्यस्थांच्या माध्यमातून पेपर मोठ्या प्रमाणावर वितरित झाल्याचा संशयही व्यक्त करण्यात येत आहे.
तपास यंत्रणांना टेलिग्राम ॲपच्या वापराबाबतही महत्त्वाचे धागेदोरे मिळाले आहेत. विविध गट आणि चॅनेल्सच्या माध्यमातून प्रश्नपत्रिका देशभरातील विद्यार्थ्यांपर्यंत पोहोचवण्यात आल्याची शक्यता तपासली जात आहे. सायबर तज्ज्ञांच्या मदतीने संबंधित डिजिटल पुरावे गोळा करण्याचे काम सुरू आहे.
या प्रकरणात आर्थिक व्यवहारांचाही मोठा तपास सुरू असून प्रश्नपत्रिका लाखो रुपयांना विकण्यात आल्याचा संशय व्यक्त केला जात आहे. CBI सध्या बँक व्यवहार, कॉल डिटेल्स, मोबाइल लोकेशन आणि ऑनलाइन चॅट्सची माहिती तपासत आहे. आरोपींमधील आर्थिक देवाणघेवाण आणि संपर्कांचे नेटवर्क उघड करण्यासाठी विशेष पथके काम करत आहेत.
दरम्यान, NEET परीक्षा रद्द झाल्यानंतर विद्यार्थ्यांमध्ये संतापाचे वातावरण आहे. अनेक विद्यार्थ्यांनी वर्षभर मेहनत घेतल्यानंतर अशा प्रकारे परीक्षा रद्द होणे अन्यायकारक असल्याची भावना व्यक्त केली आहे. विद्यार्थी संघटनांनी केंद्र सरकार आणि NTA वर कठोर टीका करत पारदर्शक परीक्षा प्रणालीची मागणी केली आहे.
नॅशनल टेस्टिंग एजन्सीने आता NEET UG परीक्षा 21 जून 2026 रोजी पुन्हा घेण्याची घोषणा केली आहे. मात्र, या प्रकरणातील तपास जसजसा पुढे सरकत आहे, तसतसे आणखी मोठे खुलासे होण्याची शक्यता व्यक्त केली जात आहे.
