Pakistan Drone Infiltration: स्वातंत्र्यदिनाच्या पार्श्वभूमीवर देशभरात सुरक्षा यंत्रणा हाय अलर्टवर असतानाच, पंजाबच्या सीमावर्ती भागात पाकिस्तानकडून घुसखोरीचा एक मोठा प्रयत्न हाणून पाडण्यात आला आहे. काल रात्रीच्या सुमारास पाकिस्तानी हद्दीतून भारतीय सीमेमध्ये 3 ड्रोन पाठवण्यात आले होते. परंतु सीमा सुरक्षा दलाच्या (BSF) सतर्कतेमुळे हा कट उधळला गेला असून, या कारवाईत मोठ्या प्रमाणात घातक शस्त्रास्त्रांचा साठा जप्त करण्यात आला आहे.
BSF च्या 142 व्या बटालियनची धडक कारवाई
खालरा सेक्टरमधील 'BOP मँगल' चौकीजवळ तैनात असलेल्या BSF च्या 142 व्या बटालियनच्या जवानांना रात्रीच्या अंधारात 3 संशयास्पद ड्रोन भारतीय हद्दीकडे येताना दिसून आले. धोका ओळखून जवानांनी त्वरित त्या ड्रोनच्या दिशेने गोळीबार केला, ज्यामुळे ड्रोन माघारी पळून गेले. या घटनेनंतर संपूर्ण परिसरात तातडीने सर्च ऑपरेशन राबवण्यात आले.
एक तस्कर ताब्यात; परदेशी बनावटीची पिस्तूलं व दारूगोळा जप्त
शोध मोहिमेदरम्यान पोलिसांनी घटनास्थळावरून मंजीत सिंग (रा. वान गाव, जिल्हा तरनतारन) नावाच्या एका तस्कराला ताब्यात घेतले आहे. तरनतारनचे एसएसपी (SSP) सुरिंदर लांबा यांनी दिलेल्या माहितीनुसार, या कारवाईत 7 परदेशी बनावटीची पिस्तूलं, सुरक्षा बंदूक, 89 जिवंत काडतुसे आणि मोबाईल फोन जप्त करण्यात आले आहेत.
पाकिस्तानी साथीदारांशी संपर्क; खालरा पोलीस ठाण्यात गुन्हा दाखल
प्राथमिक तपासात उघड झाले आहे की, पकडण्यात आलेल्या तस्कराने पाकिस्तानातील आपल्या साथीदारांशी संगनमत करून हे शस्त्रास्त्रे मागवले होते. 3 ड्रोनच्या साहाय्याने पाठवलेला हा साठा जप्त करणे ही BSF साठी अत्यंत महत्त्वाची कामगिरी मानली जात आहे. याप्रकरणी खालरा पोलीस ठाण्यात रीतसर गुन्हा दाखल करण्यात आला असून, पोलीस या आंतरराष्ट्रीय तस्करांच्या जाळ्याचा अधिक तपास करत आहेत.
