India U19 Squad: BCCI चा मोठा निर्णय; राहुल द्रविडच्या मुलासह ‘या’ युवा खेळाडूंना मिळाली श्रीलंका दौऱ्यात खेळण्याची संधी

India U19 Squad: बीसीसीआयने (BCCI) आगामी श्रीलंका दौऱ्यासाठी भारताच्या 19 वर्षांखालील (U-19) पुरुष क्रिकेट संघाची घोषणा केली आहे. या महत्त्वाच्या दौऱ्यात 3 एकदिवसीय सामने आणि 2 बहु-दिवसीय (Multi-day) सामने खेळवले जाणार आहेत. या संपूर्ण मोहिमेसाठी यशवर्धन सिंग चौहान याच्याकडे संघाच्या मुख्य कर्णधारपदाची धुरा सोपवण्यात आली असून, तो दोन्ही फॉरमॅटमध्ये भारतीय संघाचे नेतृत्व करेल. त्याच्या सोबतीला दोन्ही मालिकांसाठी लक्ष्य रायचंदानी उपकर्णधार म्हणून मैदानात उतरेल. या दौऱ्याची अधिकृत सुरुवात 4 जुलै 2026 पासून होणार आहे.

राहुल द्रविडचा मुलगा अन्वय द्रविडची एन्ट्री; रोहित आणि ईशानलाही स्थान
या संघ निवडीमध्ये सर्वांचे लक्ष माजी दिग्गज क्रिकेटपटू आणि माजी मुख्य प्रशिक्षक राहुल द्रविड यांचा मुलगा अन्वय द्रविड याने वेधून घेतले आहे. अन्वय द्रविडची एकदिवसीय मालिकेसाठी यष्टिरक्षक-फलंदाज (Wicketkeeper) म्हणून भारतीय संघात निवड करण्यात आली आहे. याशिवाय, वन-डे संघात रोहित अनिल यादव आणि ईशान सूद या युवा खेळाडूंनाही स्थान मिळाले आहे. दरम्यान, अन्वयाची बहु-दिवसीय सामन्यांसाठी निवड झालेली नाही. त्या मोठ्या फॉरमॅटच्या सामन्यांमध्ये मानव कृष्णा आणि आर्यन संदेश सकपाळ यष्टिरक्षकाची भूमिका बजावतील.

एकदिवसीय आणि बहु-दिवसीय सामन्यांचे संपूर्ण वेळापत्रक
भारतीय युवा संघाचा हा दौरा सुरुवातीला एकदिवसीय आंतरराष्ट्रीय (ODI) सामन्यांनी सुरू होईल आणि त्यानंतर बहु-दिवसीय सामने खेळवले जातील. सामन्यांचे सविस्तर वेळापत्रक खालीलप्रमाणे आहे:

एकदिवसीय (ODI) मालिका  

04 जुलै 2026: पहिला वनडे सामना
06 जुलै 2026: दुसरा वनडे सामना
09 जुलै 2026: तिसरा आणि अंतिम वनडे सामना

बहु-दिवसीय (Multi-day) सामने:

13 जुलै 2026 ते 16 जुलै 2026: पहिला सामना, गॅले
20 जुलै 2026 ते 23 जुलै 2026: दुसरा सामना, कोलंबो

हेही वाचा – India vs Sri Lanka U19 Women: श्रीलंकेला भिडणार टीम इंडिया; BCCI ने जाहीर केला भारताचा U-19 महिला संघ, 'या' खेळाडूकडे सोपवलं कर्णधारपद

दोन्ही मालिकांसाठी निवडलेले भारतीय संघ (Squads)
निवडकर्त्यांनी मर्यादित षटकांच्या आणि 4-दिवसीय सामन्यांच्या गरजा ओळखून संघात समतोल राखला आहे:

एकदिवसीय मालिकेसाठी भारतीय U-19 संघ:
सागर विर्क, लक्ष्य रायचंदानी (उपकर्णधार), यशवर्धन सिंग चौहान (कर्णधार), विनीत व्ही.के., अर्जुन राजपूत, कुशाग्र ओझा, रजत बघेल (यष्टिरक्षक), अन्वय द्रविड (यष्टिरक्षक), अनमोलजित सिंग, वुटकुरी यशवीर गौड, रोहित अनिल यादव, शाविन व्ही., काव्य परेश पटेल, मोहित उल्वा, ईशान सूद.

बहु-दिवसीय सामन्यांसाठी भारतीय U-19 संघ:
सागर विर्क, लक्ष्य रायचंदानी (उपकर्णधार), यशवर्धन सिंग चौहान (कर्णधार), पटेल कुश, मनाल चौहान, कुशाग्र ओझा, मानव कृष्णा (यष्टीरक्षक), आर्यन संदेश सकपाळ (यष्टीरक्षक), हेमचूडेशन, रोहित अनिल यादव, शाविन व्ही., प्रियांशु सिंग, प्रणव राघवेंद्र, चिगुरुपती व्यंकट.