IPL 2026 Schedule: क्रिकेट चाहत्यांची प्रतीक्षा अखेर संपली असून BCCI ने IPL 2026 च्या दुसऱ्या टप्प्याचे सविस्तर वेळापत्रक प्रसिद्ध केले आहे. यापूर्वी 28 मार्च ते 12 एप्रिल या कालावधीतील पहिल्या 20 सामन्यांची घोषणा करण्यात आली होती. आता 13 एप्रिल ते 24 मे 2026 या कालावधीत होणाऱ्या उर्वरित 50 लीग सामन्यांचे वेळापत्रक जाहीर झाल्याने चाहत्यांमध्ये उत्साहाचे वातावरण आहे. हे सामने देशातील 12 वेगवेगळ्या शहरांमध्ये खेळवले जाणार आहेत.
दुसऱ्या टप्प्यात 8 ‘डबल-हेडर्स’ची मेजवानी
स्पर्धेच्या दुसऱ्या टप्प्याची सुरुवात 13 एप्रिल रोजी हैदराबाद येथे ‘सनरायझर्स हैदराबाद’ आणि ‘राजस्थान रॉयल्स’ यांच्यातील लढतीने होईल. या टप्प्यात एकूण 8 ‘डबल-हेडर्स’ (एकाच दिवशी दोन सामने) नियोजित आहेत. दुपारचे सामने भारतीय वेळेनुसार 3:30 वाजता, तर रात्रीचे सामने 7:30 वाजता सुरू होतील. बंगळुरू, मुंबई, चेन्नई, कोलकाता, दिल्ली, अहमदाबाद, हैदराबाद, लखनौ, जयपूर, धर्मशाला, रायपूर आणि न्यू चंदीगड या शहरांमध्ये हे सामने रंगणार आहेत.
होम ग्राउंड्स आणि मैदानांचे वाटप
या टप्प्यात काही संघांनी आपल्या घरच्या मैदानांमध्ये वैविध्य ठेवले आहे. ‘पंजाब किंग्स’ आपले घरचे सामने न्यू चंदीगड आणि धर्मशाला येथे खेळणार असून, धर्मशाला येथे त्यांचे 3 सामने होतील. ‘राजस्थान रॉयल्स’चे 4 सामने जयपूरमध्ये पार पडतील. विशेष म्हणजे ‘रॉयल चॅलेंजर्स बंगळुरू’चे 3 सामने बंगळुरूमध्ये, तर 2 सामने रायपूर येथे आयोजित करण्यात आले आहेत. यामुळे स्थानिक चाहत्यांना आपल्या आवडत्या संघाचा खेळ जवळून पाहता येणार आहे.
? IPL 2026 FULL SCHEDULE ? pic.twitter.com/xRrjx7qYhs — Johns. (@CricCrazyJohns) March 26, 2026
‘प्ले-ऑफ’च्या ठिकाणांबाबत सस्पेन्स कायम
लीग फेरी आता निर्णायक वळणावर पोहोचली असून प्रत्येक संघासाठी ‘प्ले-ऑफ’मधील स्थान निश्चित करण्यासाठी ही ‘करो वा मरो’ची लढाई ठरेल. गुणतालिकेतील चुरस वाढल्याने आगामी सामन्यांमध्ये मोठी चुरस पाहायला मिळणार आहे. दरम्यान, BCCI ने अद्याप ‘प्ले-ऑफ’ आणि अंतिम सामन्याची ठिकाणे जाहीर केलेली नाहीत. या संदर्भातील अधिकृत माहिती लवकरच स्वतंत्रपणे प्रसिद्ध केली जाणार आहे.
