Digital Arrest Woman Sold House : सायबर गुन्हेगारांनी एका महिलेला 'डिजिटल अरेस्ट'ची खोटी भीती दाखवून तिची तब्बल 2,05,16,653 रुपयांची फसवणूक केल्याची धक्कादायक घटना बंगळुरूमध्ये उघडकीस आली आहे. या प्रकरणात आपली सुटका करून घेण्यासाठी पीडित महिलेने स्वतःची राहती सदनिका (फ्लॅट) आणि दोन अतिशय महागडे भूखंड (प्लॉट) कवडीमोलाने विकले. केवळ मालमत्ता विकून गुन्हेगारांचे समाधान झाले नाही, तर त्यांनी पैशांची मागणी सुरूच ठेवल्यामुळे या महिलेला बँकेकडून कर्जदेखील घ्यावे लागले. ही संपूर्ण रक्कम तिने विविध टप्प्यांवर सायबर चोरट्यांच्या खात्यात जमा केली.
कुरिअरमध्ये ड्रग्ज सापडल्याची खोटी भीती
फसवणुकीच्या या प्रकरणाची सुरुवात 19 जून रोजी झाली, जेव्हा बंगळुरूच्या न्यू थिप्पासांद्रा भागात राहणाऱ्या या महिलेला एका कुरिअर कंपनीचा प्रतिनिधी बोलत असल्याचे सांगून फोन आला. "तुमच्या नावाने आलेल्या पार्सलमध्ये अमली पदार्थ सापडले असून हे बेकायदेशीर साहित्य तुमच्या आधार क्रमांकाशी जोडलेले आहे," अशी भीती तिला घालण्यात आली. त्यानंतर मुंबई पोलिसांच्या नावाने संपर्क साधून गुन्हेगारांनी तिला धमकावण्यास सुरुवात केली. जर या प्रकरणात अटक टाळायची असेल, तर तपासात सहकार्य करा, असे सांगून तिला मानसिक दडपणाखाली आणले गेले.
दहा वर्षांच्या मुलाच्या अटकेची धमकी आणि अटी
सायबर चोरट्यांनी केवळ महिलेलाच नव्हे, तर तिच्या 10 वर्षांच्या लहान मुलालाही ड्रग्ज प्रकरणात अटक होईल, अशी मोठी भीती दाखवली. तपास पूर्ण होईपर्यंत तिला घराबाहेर पडण्यास सक्त मनाई करण्यात आली होती आणि काही विशिष्ट मोबाईल ॲप्स डाऊनलोड करण्यास भाग पाडले गेले. ही प्रक्रिया पूर्ण होईपर्यंत कोणाशीही बोलायचे नाही किंवा कोणाला काही सांगायचे नाही, असे तिला बजावण्यात आले होते. आपल्या मुलाच्या सुरक्षेसाठी आणि अटकेच्या भीतीने ही महिला 19 जून ते 17 नोव्हेंबर या दीर्घ कालावधीत सायबर चोरांच्या सूचनांचे पालन करत राहिली.
हेही वाचा – New Cyber Fraud: फोन उचलला पण समोरून शांतता…; Silent Calls म्हणजे सायबर स्कॅमर्सचा नवीन डाव?
आर्थिक विवंचना आणि मालमत्तेची विक्री
गुन्हेगारांच्या मागण्या पूर्ण करण्यासाठी पीडित महिलेने अत्यंत घाईत आपल्या मालकीची दोन रिकाम्या जमिनी आणि स्वतःचे घर बाजारभावापेक्षा कमी किमतीत विकले. या विक्रीतून आलेली सर्व मोठी रक्कम तिने आरोपींनी दिलेल्या बँक खात्यांमध्ये भरली. तिने एकूण 2 कोटी 5 लाख 16 हजार 653 रुपये सायबर चोरांना दिल्याची नोंद पोलिसांनी केली आहे. सर्व पैसे उकळल्यानंतर गुन्हेगारांनी तिला अधिकृत प्रक्रियेचा भाग म्हणून पोलीस ठाण्यात जाऊन 'ना-हरकत प्रमाणपत्र' (NOC) घेण्यास सांगितले, ज्यामुळे हा सगळा बनाव असल्याचे तिच्या लक्षात आले नाही.
पोलीस ठाण्यात गेल्यावर उघड झाले सत्य
सायबर चोरट्यांनी दिलेल्या सल्ल्यानुसार ही महिला 17 नोव्हेंबर रोजी बंगळुरूतील व्हाईटफिल्ड पोलीस ठाण्यात पोहोचली. तिथे तिने पोलिसांकडे मुंबई पोलिसांच्या नावाने 'एनओसी' मागितली असता, पोलीस अधिकारी अवाक झाले. पोलिसांनी विचारपूस केली असता तिला समजले की, ती एका मोठ्या सायबर जाळ्यात अडकली होती आणि मुंबई पोलिसांनी तिला कधीही संपर्क केला नव्हता. याप्रकरणी आता गुन्हा दाखल करण्यात आला असून पोलीस सायबर चोरट्यांचा शोध घेत आहेत. कोणत्याही कुरिअर कंपनीला किंवा पोलिसांना अशा प्रकारे 'डिजिटल अरेस्ट' करण्याचा अधिकार नसतो, असे आवाहन पोलिसांनी यानिमित्ताने केले आहे.
