Crime News: छत्तीसगडमधील भिलाई शहरातील कोहका परिसरातील एका हॉटेलमध्ये घडलेल्या घटनेमुळे परिसरात खळबळ उडाली आहे. 19 वर्षीय तरुणाचा हॉटेलच्या खोलीत मृत्यू झाल्याची घटना समोर आली असून, त्यावेळी त्याच्यासोबत 23 वर्षीय मैत्रीण उपस्थित होती. प्राथमिक माहितीनुसार, मृत तरुण स्थानिक पातळीवर डीजे म्हणून काम करत होता. बुधवारी सायंकाळी दोघेही हॉटेलमध्ये थांबण्यासाठी आले होते. रात्री उशिरा त्यांच्यात झालेल्या वादानंतर ही घटना घडल्याचा प्राथमिक अंदाज पोलिसांनी व्यक्त केला आहे.
फोन कॉलनंतर वाढला वाद; तपासात विविध बाबींची पडताळणी
स्मृती नगर पोलिसांच्या माहितीनुसार, हॉटेलमध्ये असताना तरुणाला त्याच्या पूर्वीच्या मैत्रिणीचा फोन आला होता. त्यानंतर दोघांमध्ये तीव्र शाब्दिक वाद झाल्याचे तपासात समोर आले आहे. या वादादरम्यान तरुणीला दुखापत झाल्याची माहिती पोलिसांना मिळाली असून, त्यानंतर खोलीत घडलेल्या घटनांचा क्रम नेमका काय होता, याचा तपास सुरू आहे. पोलिस विविध पुराव्यांच्या आधारे संपूर्ण घटनाक्रम स्पष्ट करण्याचा प्रयत्न करत आहेत.
सकाळी घटना उघडकीस; रुग्णालयात नेल्यानंतर मृत घोषित
गुरुवारी सकाळी तरुणीला शुद्ध आल्यानंतर तरुण प्रतिसाद देत नसल्याचे तिच्या लक्षात आले. त्यानंतर तिने परिचितांना बोलावून त्याला तातडीने खासगी रुग्णालयात नेले. मात्र, डॉक्टरांनी तपासणीनंतर त्याला मृत घोषित केले. या घटनेची माहिती मिळताच पोलिसांनी घटनास्थळी धाव घेत पंचनामा केला आणि पुढील तपास सुरू केला.
हेही वाचा – Nagpur Missing Family : नागपुरातून गायब झालेले ते कुटुंब अखेर 10 दिवसांनी सापडलं; धक्कादायक कारण आलं समोर
एफएसएल पथकाची पाहणी; सीसीटीव्ही आणि पुराव्यांची तपासणी सुरू
घटनेनंतर न्यायवैद्यक तज्ज्ञांच्या पथकाने हॉटेलमधील खोलीची पाहणी करून आवश्यक नमुने आणि इतर पुरावे गोळा केले आहेत. तसेच हॉटेलमधील सीसीटीव्ही फुटेज, नोंदवही आणि कर्मचाऱ्यांचे जबाब तपासले जात आहेत. चौकशीसाठी संबंधित तरुणीला पोलिसांनी ताब्यात घेतले असून, शवविच्छेदन अहवाल आणि इतर तपास पूर्ण झाल्यानंतरच मृत्यूमागील नेमके कारण स्पष्ट होणार असल्याचे पोलिसांनी सांगितले आहे.
