सिडनी क्रिकेट ग्राउंडवर खेळल्या गेलेल्या तिसऱ्या आणि निर्णायक वनडे सामन्यात भारताने ऑस्ट्रेलियावर 9 विकेट्सनी दमदार विजय नोंदवला. या विजयामुळे भारताने मालिकेत क्लीन स्वीप टाळला. रोहित शर्मा आणि विराट कोहली या अनुभवी जोडीने दुसऱ्या विकेटसाठी 168 धावांची भागीदारी करत भारताला सहज लक्ष्य पार करून दिले. कोहलीने खेळीत स्थिरता आणली, तर रोहितने आक्रमक फलंदाजी करत प्रतिस्पर्धी गोलंदाजांवर दबाव कायम ठेवला. मात्र, भारतीय संघासाठी चिंतेची बाब म्हणजे या सामन्यात उपकर्णधार श्रेयस अय्यर गंभीर दुखापतग्रस्त झाला.
फिल्डिंगदरम्यान अय्यरच्या डाव्या बरगडीवर चेंडू लागला आणि त्यानंतर लगेचच त्याला मैदानाबाहेर जावे लागले. दुखापत गंभीर दिसत असल्याने भारतीय संघ व्यवस्थापनाने कोणतीही जोखीम न घेता त्याला तत्काळ वैद्यकीय तपासणीसाठी रुग्णालयात पाठवले. काही वेळानंतर बीसीसीआयने अधिकृत निवेदन जारी करून परिस्थितीबाबत माहिती दिली. बोर्डने सांगितले की, प्राथमिक तपासणीत डाव्या बरगडीला इजा झाल्याचे स्पष्ट झाले असून पुढील वैद्यकीय अहवालाची प्रतीक्षा आहे.
बीसीसीआयच्या सूत्रांकडून पीटीआयने दिलेल्या माहितीनुसार, अय्यरला किमान तीन आठवडे विश्रांती घ्यावी लागण्याची शक्यता आहे. पुनरागमनापूर्वी त्याला बीसीसीआयच्या ‘सेंटर ऑफ एक्सलन्स’कडे फिटनेस अहवाल सादर करणे आवश्यक राहील. तसेच, अजून काही तपासण्या बाकी असून त्या आल्यानंतरच इजेची तीव्रता आणि त्याच्या परतीचा कालावधी निश्चित होईल. विशेष म्हणजे, जर बरगडीत हेअरलाइन फ्रॅक्चर आढळले, तर त्याच्या पुनरागमनात आणखी विलंब होऊ शकतो.
हेही वाचा: Govt Ad Rates Hike: प्रिंट माध्यमांच्या जाहिरात दरात 26% वाढ, सरकारचा मोठा निर्णय
भारतीय संघ आगामी काळात दक्षिण आफ्रिकेविरुद्ध (30 नोव्हेंबर ते 6 डिसेंबर) तीन सामान्यांची वनडे मालिका खेळणार आहे. या मालिकेत श्रेयस अय्यर उपलब्ध राहील का? याबाबत अद्याप अनिश्चितता आहे. तीन आठवड्यांत तो पूर्णपणे फिट होत असेल, तर त्याच्या पुनरागमनाची संधी असेल. मात्र, वैद्यकीय स्थितीनुसार निर्णय घेतला जाईल, असे संघ व्यवस्थापनाचे मत आहे.
अय्यर सध्या कंबरेच्या दुखापतीमुळे क्रिकेटपासून दूर आहे आणि त्याने टी20 क्रिकेटमध्येही बऱ्याच काळापासून भाग घेतलेला नाही. त्यामुळे त्याच्या फिटनेसबाबत संघाला अधिक सावधगिरी बाळगावी लागत आहे. वनडे कारकिर्दीत तो 3,000 धावांच्या उंबरठ्यावर असून, हा मैलाचा दगड पार करण्यासाठी त्याला केवळ 83 धावा आवश्यक आहेत. आगामी मालिकेत त्याला खेळण्याची संधी मिळाल्यास हा टप्पा पूर्ण होण्याची दाट शक्यता आहे.
एकूणच, भारताने सिडनीत प्रभावी विजय मिळवून मालिकेची उत्सुकता वाढवली असली, तरी श्रेयस अय्यरची दुखापत भारतीय संघासाठी नवीन डोकेदुखी ठरू शकते. पुढील काही दिवसांत मिळणारे वैद्यकीय अहवाल त्याच्या क्रिकेट कारकिर्दीच्या आगामी वेळापत्रकाचा निर्णय ठरवतील.
हेही वाचा: Women's World Cup 2025: भारतीय महिला क्रिकेट संघाची सेमीफायनलमध्ये या देशासोबत होणार लढत
