Padma Awards 2026: केंद्र सरकारकडून 2026 सालच्या प्रतिष्ठित पद्म पुरस्कारांची घोषणा करण्यात आली असून कला, संस्कृती, समाजसेवा आणि विविध क्षेत्रांतील मान्यवरांच्या योगदानाला राष्ट्रीय पातळीवर सन्मान देण्यात आला आहे. यंदा एकूण 131 व्यक्तींना पद्म पुरस्कार जाहीर करण्यात आले असून, त्यामध्ये पद्मविभूषण, पद्मभूषण आणि पद्मश्री पुरस्कारांचा समावेश आहे. या यादीत 19 महिलांचा समावेश असून, परदेशी, एनआरआय, पीआयओ आणि ओसीआय श्रेणीतील सहा मान्यवरांनाही गौरवण्यात आले आहे. विशेष म्हणजे यंदा 16 पुरस्कार मरणोत्तर स्वरूपात जाहीर करण्यात आले आहेत.
पद्म पुरस्कार 2026 च्या यादीत दिवंगत ज्येष्ठ अभिनेते धर्मेंद्र सिंह देओल यांचे नाव अग्रक्रमाने आहे. भारतीय चित्रपटसृष्टीत सहा दशकांहून अधिक काळ आपली छाप उमटवणाऱ्या धर्मेंद्र यांना कला क्षेत्रातील अतुलनीय योगदानासाठी मरणोत्तर पद्मविभूषण प्रदान करण्याचा निर्णय घेण्यात आला आहे. गृह मंत्रालयाकडून प्रसिद्ध करण्यात आलेल्या अधिकृत यादीत हा निर्णय जाहीर करण्यात आला असून, चित्रपटसृष्टीसह चाहत्यांमध्ये भावनिक प्रतिक्रिया उमटत आहेत.
धर्मेंद्र यांचे नाव बॉलिवूडच्या सुवर्णकाळाशी जोडले गेले आहे. ‘ही-मॅन’ अशी ओळख मिळवणारे धर्मेंद्र यांनी अभिनय, व्यक्तिमत्त्व आणि संवादफेक यांमुळे लाखो प्रेक्षकांची मने जिंकली. 1960 साली ‘दिल भी तेरा हम भी तेरे’ या चित्रपटातून त्यांनी आपल्या अभिनय कारकिर्दीची सुरुवात केली. त्यानंतर ‘फूल और पत्थर’, ‘मेरा गाव मेरा देश’, ‘यादों की बारात’, ‘नौकर बीवी का’, ‘घायल’ यांसारख्या अनेक गाजलेल्या चित्रपटांमधून त्यांनी अविस्मरणीय भूमिका साकारल्या. यापूर्वी 2012 मध्ये त्यांना पद्मभूषण पुरस्काराने सन्मानित करण्यात आले होते. आता पद्मविभूषण हा सन्मान त्यांच्या कलाविष्काराचा आणि भारतीय चित्रपटसृष्टीतील योगदानाचा सर्वोच्च गौरव मानला जात आहे.
दरम्यान, संगीत क्षेत्रातील दिग्गज गायिका अलका याग्निक यांनाही यंदा पद्मभूषण पुरस्कार जाहीर करण्यात आला आहे. हिंदी चित्रपटसृष्टीतील सर्वाधिक लोकप्रिय गायिकांपैकी एक असलेल्या अलका याग्निक यांनी अनेक दशकांपर्यंत आपल्या आवाजाने प्रेक्षकांच्या मनावर अधिराज्य गाजवले. प्रेम, विरह, आनंद आणि वेदना अशा प्रत्येक भावनेला स्वर देणाऱ्या त्यांच्या गीतांनी भारतीय संगीताला वेगळी ओळख दिली आहे.
पद्मविभूषण हा देशातील दुसरा सर्वोच्च नागरी सन्मान असून, अपवादात्मक आणि अत्यंत उल्लेखनीय सेवेसाठी दिला जातो. तर पद्मभूषण पुरस्कार हा विशिष्ट क्षेत्रातील महत्त्वपूर्ण योगदानासाठी प्रदान केला जातो. धर्मेंद्र आणि अलका याग्निक यांना मिळालेल्या या सन्मानामुळे कला आणि सांस्कृतिक क्षेत्रातील योगदानाचे महत्त्व पुन्हा एकदा अधोरेखित झाले आहे.
पद्म पुरस्कार 2026 ची ही घोषणा केवळ सन्मानाचीच नाही, तर भारतीय कला, संगीत आणि चित्रपटसृष्टीच्या समृद्ध परंपरेला मानवंदना देणारी ठरली आहे.
