तेहरान: गेल्या साडेतीन दशकांपासून इराणच्या राजकारणाचे सर्वोच्च केंद्र राहिलेले अयातुल्ला अली खामेनेई यांचे युग अखेर संपुष्टात आले आहे. तेहरानच्या आकाशात घोंघावणाऱ्या इस्रायली लढाऊ विमानांनी केवळ बॉम्बवर्षाव केला नाही, तर पश्चिम आशियाच्या इतिहासाला एक अनपेक्षित कलाटणी दिली आहे. गेल्या 24 तासांपासून सुरू असलेल्या तर्क-वितर्कांना पूर्णविराम देत, इराणच्या अधिकृत 'प्रेस टीव्ही'ने खामेनेई यांच्या निधनाच्या वृत्ताला दुजोरा दिला असून, यामुळे संपूर्ण जगात खळबळ उडाली आहे.
'ऑपरेशन न्यू ऑर्डर' आणि काळरात्र
इस्रायलने अत्यंत गुप्तपणे आखलेल्या 'ऑपरेशन न्यू ऑर्डर' अंतर्गत तेहरानमधील खामेनेई यांचे निवासस्थान आणि त्याखालील अभेद्य बंकरला लक्ष्य करण्यात आले. हा हल्ला इतका भीषण होता की, खामेनेई यांच्यासह त्यांचे कुटुंबीय आणि अनेक उच्चपदस्थ लष्करी अधिकारी जागीच ठार झाले. सुरुवातीला इराणने हे वृत्त फेटाळून लावत प्रतिमा जपण्याचा प्रयत्न केला; मात्र उद्ध्वस्त झालेल्या ढिगाऱ्याखालून सत्य बाहेर आल्यानंतर इराणच्या सरकारी माध्यमांना अधिकृत घोषणा करणे भाग पडले.
इराणमध्ये 40 दिवसांचा शोक, सात दिवस टाळेबंदी
खामेनेई यांच्या निधनामुळे इराणमध्ये सध्या भीषण शांतता आणि संतापाचे वातावरण आहे. या धक्क्यातून सावरण्यासाठी इराण सरकारने संपूर्ण देशात 40 दिवसांचा 'राष्ट्रीय शोक' घोषित केला आहे. तसेच, परिस्थिती हाताबाहेर जाऊ नये यासाठी सात दिवसांची सार्वजनिक सुट्टी जाहीर करत कडक लष्करी बंदोबस्त तैनात केला आहे. 1989 पासून इराणची सूत्रे हातात ठेवणाऱ्या नेत्याचा असा अंत होईल, याची कल्पनाही कदाचित तेहरानने केली नसावी.
डोनाल्ड ट्रम्प यांचा दावा ठरला अचूक
विशेष म्हणजे, अमेरिकेचे राष्ट्राध्यक्ष डोनाल्ड ट्रम्प यांनी काही तासांपूर्वीच 'ट्रुथ सोशल'वर एक पोस्ट करत खामेनेई मारले गेल्याचे संकेत दिले होते. ट्रम्प यांचा हा दावा अखेर खरा ठरला असून, अमेरिकन गुप्तचर यंत्रणांचे नेटवर्क किती सखोल आहे, हे पुन्हा एकदा सिद्ध झाले आहे. इराणच्या सर्वोच्च नेतृत्वावर थेट प्रहार करून इस्रायल आणि अमेरिकेने अघोषित युद्धाची ठिणगी टाकली असल्याची चर्चा आता जागतिक स्तरावर रंगली आहे.
इराणचे प्रत्युत्तर काय असेल?
खामेनेई यांच्या निधनानंतर आता इराणची धुरा कोणाकडे जाणार? हा प्रश्न जेवढा महत्त्वाचा आहे, त्याहूनही भीतीदायक प्रश्न हा आहे की इराण याचे किती भीषण प्रत्युत्तर देणार? "रक्ताचा बदला रक्तानेच" ही भूमिका घेणारा इराण आता शांत राहणार की इस्रायलवर क्षेपणास्त्रांचा पाऊस पाडणार, याकडे जगाचे डोळे लागले आहेत. पश्चिम आशियातील हा संघर्षाचा वणवा आता केवळ दोन देशांपुरता मर्यादित न राहता जागतिक महायुद्धाचे रूप धारण करण्याची शक्यता नाकारता येत नाही.
