चीनमध्ये IM Motors या कंपनीने आपली नवी SUV LS9 लाँच करण्याची घोषणा केली आहे. ही गाडी 12 नोव्हेंबरला अधिकृतपणे बाजारात येणार आहे. या SUV ची किंमत सुमारे 3,36,900 युआन म्हणजेच अंदाजे 46,800 डॉलर्स पासून सुरू होईल, तर सर्वात महाग मॉडेलची किंमत 3,66,900 युआन म्हणजेच सुमारे 51,000 डॉलर्स असेल. कंपनीने 4 नोव्हेंबरला बुकिंग सुरू केलं आणि अवघ्या 30 मिनिटांत 8,000 हून अधिक लोकांनी ही SUV बुक केली. LS9 ही SUV आपल्या वैशिष्ट्यांमुळे चर्चेत आली आहे. कारण ही गाडी शॉवर सुविधेसह येते.
गाडीच्या मागील भागात एक छोटं शॉवर लावता येतं. यात 10 लिटरचं पाणी साठवण्यासाठी टँक आहे, आणि हे पाणी 1200 वॅटच्या हीटरने फक्त 10 मिनिटांत 45 डिग्री सेल्सिअसपर्यंत गरम करता येतं. याचा उपयोग बाहेरच्या प्रवासानंतर ताजेतवाने होण्यासाठी करता येतो. हा शॉवर सुमारे एका मिनिटापुरतंच पाणी पुरवू शकतं. ही SUV 1.5T इंजिन आणि इलेक्ट्रिक मोटर यांच्या संयोजनावर चालते. एकत्रित शक्ती 390 किलोवॅट आणि 670 न्यूटन मीटर टॉर्क आहे. यात दोन बॅटरीचे पर्याय आहेत, 52 किलोवॅट तास आणि 66 किलोवॅट तास. फक्त इलेक्ट्रिक मोडवर ही गाडी 402 किलोमीटर चालू शकते, तर एकूण रेंज 1508 किलोमीटर इतकी आहे. 0 ते 100 किलोमीटर प्रति तास वेग ही SUV फक्त 4 सेकंदांत पकडते.
या गाडीचं डिझाइन आधुनिक आणि आकर्षक आहे. समोर बंद ग्रिल, ‘L’ आकाराचे हेडलाइट्स आणि सलग LED लाईट पट्टी तिला वेगळा लुक देतात. या गाडीत एक खास प्रोजेक्टर लाईट आहे, जो 8,000 चौरस मीटरपर्यंत परिसर उजळवू शकतो. म्हणजेच एका लहान स्टेडियमइतका भाग प्रकाशित होऊ शकतो. गाडीच्या आत एक 27.1 इंचाचा 5K डिस्प्ले आणि 15.6 इंचाचा पॅसेंजर स्क्रीन आहे. दुसऱ्या रांगेत 21.5 इंचाचं छतावर बसवलेलं स्क्रीनही आहे. प्रत्येक सीटसाठी व्हेंटिलेशन, हीटिंग आणि मसाज सुविधा दिली आहे.
गाडीत B&O ऑडिओ सिस्टम आणि 4D मसाज सीट्सही आहेत. LS9 मध्ये स्मार्ट एअर सस्पेंशन, डिजिटल चेसिस आणि चारही चाकांना वळण देणारी प्रणाली आहे. त्यामुळे गाडीचा टर्निंग रेडियस फक्त 4.95 मीटर इतका कमी राहतो. यात लिडार सेन्सर आणि Nvidia Thor चिप आहे, जी गाडीला स्वयंचलित ड्रायव्हिंगसाठी मदत करते. IM Motors ची LS9 ही SUV केवळ वेगवान आणि तांत्रिक नाही, तर ती प्रवाशांसाठी एक छोटंसं फिरतं घर वाटेल अशी आहे. अंगभूत शॉवर, आलिशान सीट्स आणि आधुनिक तंत्रज्ञान यामुळे ही गाडी लक्झरी SUV च्या जगात एक वेगळी ओळख निर्माण करणार आहे.
