चेन्नई: ‘रात्रीच्या अंधारानंतर उद्याची सोनेरी पहाट नक्कीच उगवते’, या उक्तीचा प्रत्यय आयपीएल 2026 च्या 18 व्या सामन्यात आला. आरसीबी, पंजाब किंग्ज आणि राजस्थान रॉयल्सकडून लागोपाठ तीन मोठे पराभव पत्करल्यानंतर चेन्नई सुपर किंग्सच्या (CSK) गोटात नैराश्याचे ढग दाटले होते.
मात्र, त्यांच्या घरच्या मैदानावर, म्हणजेच चेन्नईच्या एम. ए. चिदंबरम स्टेडियमवर, यजमानांनी राखेतून भरारी घेणाऱ्या फिनिक्स पक्ष्याप्रमाणे दमदार पुनरागमन केले आहे. कर्णधार ऋतुराज गायकवाडच्या नेतृत्वाखाली चेन्नईने दिल्ली कॅपिटल्सला 23 धावांनी धूळ चारत स्पर्धेत विजयाचे बहुप्रतीक्षित खाते उघडले आहे.
या ऐतिहासिक विजयाचा आणि चेन्नईच्या पुनरागमनाचा खरा शिल्पकार ठरला तो यष्टीरक्षक-फलंदाज संजू सॅमसन! त्याने दिल्लीच्या गोलंदाजीची अक्षरशः पिसे काढली. कर्णधार ऋतुराजसोबत सलामीला आलेल्या संजूने पहिल्या चेंडूपासूनच आक्रमक पवित्रा घेत अवघ्या 26 चेंडूंत त्याचे अर्धशतक पूर्ण केले.
4⃣th #TATAIPL hundred ✅
Match-winner for #CSK ✅ Player of the Match Sanju Samson's memorable outing in Chennai ? WATCH his knock ▶️ https://t.co/86wJ2Oi86E#KhelBindaas | #CSKvDC | @IamSanjuSamson pic.twitter.com/dDF26MzDWr — IndianPremierLeague (@IPL) April 11, 2026
त्याचा हा झंझावात तिथेच थांबला नाही, तर 52 चेंडूंचा सामना करताना त्याने त्याचे शतकही साजरे केले. हे शतक त्याच्या आयपीएल कारकिर्दीतील सर्वात वेगवान तर ठरलेच, शिवाय आयपीएल 2026 च्या हंगामातील हे पहिलेच शतक ठरल्याने त्याला एक खास महत्त्व प्राप्त झाले आहे. संजूने 56 चेंडूंत 15 नेत्रदीपक चौकार आणि चार उत्तुंग षटकारांची आतषबाजी करत 205.35 च्या भन्नाट स्ट्राईक रेटने 115 धावा कुटल्या.
संजूच्या या वादळी शतकाला इतर फलंदाजांनीही मोलाची साथ दिली. कर्णधार ऋतुराज (18 चेंडूत 15 धावा) मोठी खेळी उभारण्यात अपयशी ठरला असला, तरी युवा आयुष म्हात्रेने 36 चेंडूंत 59 धावांची झुंजार खेळी करत संजूला उत्कृष्ट साथ दिली (रिटायर्ड आउट). डावाच्या अखेरच्या टप्प्यात शिवम दुबेने त्याच्या ‘ट्रेडमार्क’ शैलीत अवघ्या 10 चेंडूंत 20 धावा चोपल्या आणि चेन्नईचा धावफलक निर्धारित 20 षटकांत दोन बाद 212 या विशाल धावसंख्येवर नेऊन ठेवला. या धावांच्या डोंगरापुढे दिल्लीचे गोलंदाज निष्प्रभ ठरले, केवळ कर्णधार अक्षर पटेलला एक विकेट मिळवण्यात यश आले.
विजयासाठी 213 धावांच्या महाकाय लक्ष्याचा पाठलाग करताना दिल्ली कॅपिटल्सने चांगली सुरुवात केली होती. सलामीवीर पाथुम निसांकाने 24 चेंडूंत 41 धावांची आक्रमक खेळी केली, तर के. एल. राहुलनेही 10 चेंडूंत 18 धावांचे योगदान दिले. मात्र, भक्कम सुरुवातीनंतर दिल्लीच्या मधल्या फळीने कच खाल्ली. अक्षर पटेल (1) आणि समीर रिझवी (6) स्वस्तात तंबूत परतल्याने दिल्लीच्या अडचणी वाढल्या. एका बाजूने ट्रिस्टन स्टब्सने एकाकी झुंज देत 60 धावांची धडाकेबाज खेळी केली आणि आशुतोष शर्मानेही 10 चेंडूंत 19 धावांची फटकेबाजी करून विजयाच्या आशा पल्लवित केल्या होत्या. परंतु, मोक्याच्या क्षणी विकेट्स गमावल्यामुळे दिल्लीचा डाव निर्धारित 20 षटकांत 189 धावांवरच मर्यादित राहिला.
हा सामना चेन्नईसाठी केवळ एक विजय नसून, स्पर्धेतील त्यांच्या अस्तित्वाची नांदी ठरणारा आहे. या महत्त्वपूर्ण विजयामुळे चेन्नई सुपर किंग्सने गुणतालिकेत 10 व्या स्थानावरून थेट 9 व्या स्थानावर झेप घेत दोन गुणांची कमाई केली आहे. दुसरीकडे, चार सामन्यांमधील दुसरा पराभव स्वीकारलेल्या दिल्ली कॅपिटल्सला आता त्यांच्या रणनीतीत गंभीर बदल करावे लागतील. सलग पराभवांच्या गर्तेतून बाहेर पडून चेन्नईने दाखवलेली ही ‘चॅम्पियन’ मानसिकता त्यांच्या पुढील प्रवासासाठी नक्कीच संजीवनी ठरेल.
