मुंबई: भारतीय क्रिकेट संघाने आयसीसी पुरुष टी-20 विश्वचषक 2026 च्या अंतिम सामन्यात न्यूझीलंडचा पराभव करत पुन्हा एकदा विश्वचषकावर भारताचा तिरंगा अभिमानाने फडकावला. रविवार, 8 मार्च रोजी झालेल्या या रोमांचक अंतिम लढतीत टीम इंडियाने संयम, कौशल्य आणि संघभावनेचा उत्कृष्ट नमुना सादर करत न्यूझीलंडच्या क्रिकेट संघावर निर्णायक विजय मिळवला. या ऐतिहासिक कामगिरीनंतर देशभरात आनंदाचा जल्लोष उसळला असून क्रिकेटप्रेमींसाठी हा क्षण अभिमानाचा ठरला आहे.
What a breathtaking night for #TeamIndia and the entire nation ?? The #MenInBlue win by 9️⃣6️⃣ runs to defend the ICC Men's #T20WorldCup title ?#Final | #INDvNZ pic.twitter.com/N6gPRBW0Ri — BCCI (@BCCI) March 8, 2026
या विजयाचा आनंद केवळ क्रिकेट चाहत्यांपुरता मर्यादित राहिला नाही, तर क्रीडा आणि मनोरंजन विश्वातील अनेक मान्यवरांनीही भारतीय संघाचे अभिनंदन केले आहे. सोशल मीडियावर अभिनंदनाचा अक्षरशः वर्षाव होत असताना बॉलिवूडमधील ज्येष्ठ अभिनेते अमिताभ बच्चन यांच्या एका हलक्याफुलक्या पोस्टने विशेष लक्ष वेधून घेतले.
अमिताभ बच्चन यांनी सोशल मीडिया प्लॅटफॉर्म एक्सवर टीम इंडियाच्या विजयाचे काही क्षण शेअर करत एक विनोदी टिप्पणी केली. त्यांनी आपल्या पोस्टमध्ये लिहिले, “मी सामना पाहिला नाही तरच भारत जिंकतो, असे सांगितले होते… आणि तसेच झाले!” त्यांच्या या विधानातून त्यांनी ‘लकी टोटक्याचा’ पुन्हा एकदा उल्लेख केला आणि चाहत्यांना हसण्याची संधी दिली.
T 5679 – कहा था नहीं देखूँगा तो जीत जाएँगे ! हो गया ! pic.twitter.com/JHgQyc2v2S — Amitabh Bachchan (@SrBachchan) March 8, 2026
विशेष म्हणजे बिग बी यापूर्वीही अनेक वेळा सांगत आले आहेत की, ते जेव्हा भारताचा महत्त्वाचा सामना पाहतात तेव्हा संघ पराभूत होतो, असा त्यांचा समज आहे. त्यामुळे भारताचा निर्णायक सामना असला की ते तो प्रत्यक्ष पाहणे टाळतात. त्यांच्या मते, हा एक मजेशीर ‘टोटका’ आहे, जो ते भारतीय संघाच्या विजयासाठी पाळतात.
दरम्यान, त्यांच्या या पोस्टवर चाहत्यांकडून मोठ्या प्रमाणात प्रतिक्रिया उमटल्या आहेत. काहींनी विनोदी शैलीत प्रतिक्रिया देत बिग बींच्या समजुतीवर हलकीफुलकी टिप्पणी केली. एका चाहत्याने लिहिले, “सर, तुम्हाला अजूनही असे का वाटते?” तर दुसऱ्या एका युजरने लिहिले, “हा तर केवळ योगायोग आहे सर”.
भारतीय संघाच्या या शानदार विजयानंतर देशभरात उत्सवाचे वातावरण पाहायला मिळत आहे. अनेक शहरांमध्ये चाहत्यांनी रस्त्यावर उतरून जल्लोष साजरा केला, तर सोशल मीडियावर अभिनंदनाचा पूर आला आहे. टी-20 विश्वचषक 2026 मधील हा विजय भारतीय क्रिकेटसाठी आणखी एक अभिमानाचा अध्याय ठरला असून खेळाडूंच्या समर्पण आणि उत्कृष्ट कामगिरीचे सर्वत्र कौतुक होत आहे.
