येवला शहरात आज मतदानाच्या दिवशी एक अनोखा आणि प्रेरणादायी प्रसंग पाहायला मिळाला. लग्नाकरिता सजलेल्या नवरा-नवरीने बहुल्यावर चढण्यापूर्वी थेट मतदान केंद्रावर जाऊन मतदानाचा हक्क बजावला. लग्नाच्या वेशभूषेतच केंद्रावर पोहोचलेल्या या जोडप्याने आदर्श नागरिकत्वाचे उत्तम उदाहरण घालून दिले असून नागरिकांकडून त्यांचे कौतुक होत आहे.
येवल्यात सकाळपासूनच मतदान प्रक्रिया कडेकोट बंदोबस्तात सुरू झाली आहे. शहरातील 13 प्रभागांसाठी आज मतदान होत असून एक नगराध्यक्ष आणि नगरसेवकांची निवड होणार आहे. एकूण 40,903 मतदार या निवडणुकीत सहभागी होणार आहेत.
अशा पार्श्वभूमीवर, लग्नाच्या अगदी आधी नवरा आणि नवरीने मतदान केंद्रावर जाऊन आपला लोकशाही हक्क बजावला. सामाजिक जाणीव जपणाऱ्या या कृतीमुळे मतदानाला प्रोत्साहन मिळत असल्याचे स्थानिक नागरिकांनी म्हटले आहे. जय महाराष्ट्र न्यूजसोबत बोलताना नवरा-नवरी म्हणाले, “आम्ही आधी मतदान करून नागरिक म्हणून आपली जबाबदारी पार पाडली आणि नंतरच लग्नाच्या सात फेऱ्या घेणार आहोत.” त्यांच्या या भूमिकेमुळे तरुण मतदारांमध्येही सकारात्मक संदेश गेल्याचे दिसत आहे.
दरम्यान, राज्यातील विविध जिल्ह्यांतही आज सकाळपासून मतदान उत्साहात सुरू असून मतदार मोठ्या प्रमाणात मतदान केंद्रांवर दाखल होत आहेत. लोकशाही सुदृढ ठेवण्यासाठी मतदारांची ही सक्रियता महत्त्वाची मानली जात आहे.
