वाराणसी: देशातील प्रीमियम रेल्वे सेवा म्हणून ओळखली जाणारी वंदे भारत एक्सप्रेस पुन्हा एकदा खाद्यपदार्थांच्या गुणवत्तेवरून चर्चेत आली आहे. वाराणसी ते देवघर प्रवास करणाऱ्या एका महिलेने ट्रेनमध्ये दिलेल्या जेवणामुळे स्वतःची आणि तिच्या दोन वर्षांच्या मुलाची प्रकृती बिघडल्याचा गंभीर आरोप केला आहे.
आयुषी सिंग असे या महिलेचे नाव असून, त्या 27 मार्च रोजी ट्रेन क्रमांक 22500 मधून त्यांच्या कुटुंबासोबत प्रवास करत होत्या. त्यांनी दिलेल्या माहितीनुसार, कोच ई1 मध्ये प्रवासादरम्यान दिलेले जेवण खाल्ल्यानंतर काही वेळातच त्यांना तीव्र ॲलर्जी झाली. त्यांच्या ओठांना मोठी सूज आली, तर त्यांच्या लहान मुलाला जुलाबाचा त्रास सुरू झाला.
महिलेने केवळ जेवणावरच नव्हे, तर ट्रेनमध्ये दिल्या जाणाऱ्या पिण्याच्या पाण्याच्या चवीवरही प्रश्नचिन्ह उपस्थित केले आहे. वेळेत वैद्यकीय उपचार मिळाले नसते, तर परिस्थिती अधिक गंभीर झाली असती, असा दावा त्यांनी केला आहे. या घटनेचे फोटो आणि वैद्यकीय अहवाल सोशल मीडियावर वेगाने व्हायरल झाले आहेत.
@IRCTCofficial @RailwaySeva @RailMinIndia @K44869654Kumar Worst quality food provided on vande bharat express and insensitive attitude of staff towards complaints. This is my medical prescription describing severe allergy after consuming food in Vande Bharat 22500. pic.twitter.com/ddfg2mMUC9 — The_Mediocre_Fille (@AyushiS54377868) March 31, 2026
या प्रकरणावर IRCTC (Indian Railway Catering and Tourism Corporation) ने प्रतिक्रिया देत सांगितले की, संबंधित दिवशी दिलेल्या अन्नाच्या नमुन्यांची तपासणी करण्यात आली असून ते सुरक्षित आढळले आहेत. तसेच, त्या दिवशी खाद्य गुणवत्तेबाबत कोणतीही अधिकृत तक्रार नोंदवली गेली नव्हती, असेही स्पष्ट करण्यात आले.
IRCTC ने संबंधित महिला प्रवाशाशी संपर्क साधून अधिक माहिती मागवली असून, या संपूर्ण प्रकरणाची सखोल चौकशी करण्याचे आश्वासन दिले आहे. या घटनेमुळे रेल्वेतील खाद्यपदार्थांच्या गुणवत्तेबाबत पुन्हा एकदा प्रश्न उपस्थित झाले असून, प्रवाशांच्या सुरक्षेबाबत अधिक दक्षता घेण्याची गरज अधोरेखित झाली आहे.
Lunch on Train No. 22500 BSB-DGHR Vande Bharat Express (Coach E1) on 27.03.2026 was checked & found satisfactory. No other complaints received reg. Quality/Hygiene or safety of food on the day. — IRCTC (@IRCTCofficial) March 30, 2026
एकूणच, वंदे भारत एक्सप्रेससारख्या आधुनिक आणि प्रगत सेवेमध्ये अशा प्रकारच्या तक्रारी समोर येणे चिंतेची बाब मानली जात आहे. या प्रकरणातील तपासानंतरच नेमकी वस्तुस्थिती स्पष्ट होणार असून, भविष्यात अशा घटना टाळण्यासाठी आवश्यक उपाययोजना केल्या जाण्याची अपेक्षा व्यक्त केली जात आहे.
