अमेरिका आणि इराण यांच्यात सुरू असलेला संघर्ष एक महिना उलटूनही थांबण्याची चिन्हे दिसत नाहीत. अमेरिकेचे राष्ट्राध्यक्ष डोनाल्ड ट्रम्प यांच्या आदेशानंतर अमेरिकन सैन्य इराणवर सातत्याने हल्ले करत आहे. त्याला प्रत्युत्तर देताना इराणनेही अमेरिकेला मोठे नुकसान पोहोचवल्याचे सांगितले जात आहे. या संघर्षात इस्रायल देखील सहभागी असल्याने परिस्थिती अधिक गंभीर बनली आहे.
या युद्धाच्या पार्श्वभूमीवर मध्यपूर्वेतील राजकीय समीकरणे झपाट्याने बदलताना दिसत आहेत. सौदी अरेबिया चे युवराज मोहम्मद बिन सलमान आणि रशिया चे राष्ट्राध्यक्ष व्लादिमीर पुतिन यांच्यात नुकतीच दूरध्वनीवर चर्चा झाली. या चर्चेत दोन्ही नेत्यांनी मध्यपूर्वेतील तणावपूर्ण परिस्थितीवर चिंता व्यक्त करत युद्ध थांबवण्याची गरज अधोरेखित केली.
रशियाकडून मिळालेल्या अधिकृत माहितीनुसार, या दोन्ही नेत्यांनी तातडीने युद्धविराम (सीजफायर) होण्याची आवश्यकता व्यक्त केली. हजारो लोकांचा बळी गेलेल्या या संघर्षामुळे संपूर्ण खाडी प्रदेश अस्थिर झाला आहे. त्यांनी सर्व पक्षांचे हित लक्षात घेऊन राजनैतिक मार्गाने या प्रश्नाचे समाधान काढण्यावर भर दिला.
दरम्यान, अमेरिका आणि सौदी अरेबिया यांच्यातील संबंधांमध्ये दुरावा निर्माण होत असल्याचे संकेत मिळत आहेत. डोनाल्ड ट्रम्प यांनी अलीकडेच सौदी नेतृत्वावर दबाव टाकणारे वक्तव्य केले होते. त्यानंतर सौदी अरेबिया रशियाच्या अधिक जवळ जात असल्याचे चित्र दिसत आहे. त्यामुळे सलमान आणि पुतिन यांच्यातील संवादाला आंतरराष्ट्रीय पातळीवर विशेष महत्त्व प्राप्त झाले आहे.
या युद्धाचा परिणाम जागतिक ऊर्जा क्षेत्रावरही गंभीरपणे जाणवत आहे. स्ट्रेट ऑफ हॉर्मुज मार्गावर इराणने निर्बंध घातल्यामुळे तेल आणि वायू पुरवठा विस्कळीत झाला आहे. त्यामुळे अनेक देशांमध्ये ऊर्जा टंचाई निर्माण झाली असून कच्च्या तेलाच्या किंमतीत मोठी वाढ होण्याची शक्यता वर्तवली जात आहे.
या पार्श्वभूमीवर पाकिस्तान सारख्या देशांवर महागाईचा अतिरिक्त ताण येत आहे. एकूणच, हा संघर्ष केवळ दोन देशांपुरता मर्यादित न राहता जागतिक अर्थव्यवस्था आणि राजकारणावर दूरगामी परिणाम करणारा ठरत आहे.
