उत्तर प्रदेशमध्ये दहशतवादविरोधी यंत्रणांनी मोठी कारवाई करत संशयित गुप्तहेर जाळ्याचा पर्दाफाश केला आहे. या कारवाईमुळे संपूर्ण परिसरात खळबळ उडाली असून, राष्ट्रीय सुरक्षेबाबत गंभीर चिंता व्यक्त केली जात आहे.
उत्तर प्रदेश ATS (Anti Terrorism Squad ) च्या देवबंद युनिटने शामली जिल्ह्यातील कैराना भागात विविध ठिकाणी छापेमारी करत पाच संशयितांना ताब्यात घेतले आहे. या संशयितांवर पाकिस्तानसाठी गुप्त माहिती पाठवण्याचा आरोप आहे. छापेमारीदरम्यान इंतजार उर्फ टार्जन आणि साजिद यांच्यासह एकूण पाच जणांना अटक करण्यात आली.
प्राथमिक तपासात धक्कादायक माहिती समोर आली आहे. हे संशयित पाकिस्तानमधील हँडलर्सच्या संपर्कात होते आणि संवेदनशील माहितीची देवाणघेवाण करत होते, असा संशय आहे. त्यांच्या मोबाईल फोन आणि इतर इलेक्ट्रॉनिक उपकरणांची सखोल तपासणी सुरू असून, त्यातून आणखी महत्त्वाचे धागेदोरे मिळण्याची शक्यता आहे.
दरम्यान, ATSची आणखी एक टीम देवबंद परिसरात तळ ठोकून असून, या नेटवर्कमधील इतर सदस्यांचा शोध घेत आहे. यापूर्वी गाझियाबाद येथे उघड झालेल्या दहशतवादी मॉड्यूलनंतर ATSने राज्यभरात शोधमोहीम तीव्र केली आहे.
या प्रकरणात लखनऊ येथून साकिबसह चार संशयितांना अटक करण्यात आली होती. हे आरोपी पाकिस्तानमधील हँडलर्सच्या संपर्कात असून, लखनऊसह अनेक शहरांमध्ये स्फोट घडवण्याचा कट रचत होते, अशी माहिती तपासातून समोर आली आहे.
शामलीचे पोलिस अधीक्षक नरेंद्र प्रताप सिंग यांनी दिलेल्या माहितीनुसार, कैराना कोतवाली क्षेत्रातून चार पुरुष आणि सदर क्षेत्रातून एका महिलेला अटक करण्यात आली आहे. सर्व आरोपींना पुढील चौकशीसाठी देवबंद येथे नेण्यात आले आहे.
या कारवाईनंतर कैराना आणि आसपासच्या भागात सुरक्षा व्यवस्था कडक करण्यात आली आहे. स्थानिक पोलीस आणि गुप्तचर यंत्रणा सतर्क असून, संशयास्पद हालचालींवर बारकाईने लक्ष ठेवले जात आहे. या प्रकरणामुळे राज्यातील सुरक्षा यंत्रणा अधिक सतर्क झाल्याचे स्पष्ट झाले आहे.
