जळगाव: महाराष्ट्राच्या राजकारणात ‘इनकमिंग’चा ओघ थांबण्याचे नाव घेत नाहीये. नुकत्याच पार पडलेल्या स्थानिक स्वराज्य संस्थांच्या निवडणुकीनंतर राजकीय समीकरणे वेगाने बदलत असतानाच, उत्तर महाराष्ट्रात उद्धव ठाकरे गटाला उपमुख्यमंत्री एकनाथ शिंदे यांनी मोठा हादरा दिला आहे. जळगाव लोकसभा मतदारसंघाचे माजी खासदार आणि ठाकरे गटाचे वजनदार नेते उन्मेश पाटील यांनी शेकडो समर्थकांसह अधिकृतपणे शिवसेनेत (शिंदे गट) प्रवेश केला आहे. या पक्षप्रवेशामुळे जळगाव जिल्ह्यासह संपूर्ण उत्तर महाराष्ट्रात ठाकरे गटाच्या बालेकिल्ल्याला मोठे भगदाड पडल्याची चर्चा राजकीय वर्तुळात रंगली आहे.
केवळ एक माजी खासदारच नव्हे, तर त्यांच्यासोबत भाजप आणि राष्ट्रवादी काँग्रेसच्या अनेक दिग्गज पदाधिकाऱ्यांनीही ‘धनुष्यबाण’ हाती घेतला आहे. यामध्ये पंचायत समितीचे माजी सभापती दिनेश बोरसे, भाऊसाहेब पाटील, लीलाभाई पाटील, रवी चौधरी, चंदू तायडे आणि चिरागउद्दीन शेख यांसारख्या स्थानिक नेत्यांचा समावेश आहे. जळगावच्या राजकारणात या सर्व नेत्यांचा मोठा जनाधार असल्याने, हा प्रवेश आगामी निवडणुकांच्या पार्श्वभूमीवर महायुतीची ताकद द्विगुणित करणारा ठरला आहे. उपमुख्यमंत्री एकनाथ शिंदे यांनी स्वतः सोशल मीडियावरून या पक्षप्रवेशाचे स्वागत करत विरोधकांना सूचक इशारा दिला आहे.
विशेष म्हणजे, हा सोहळा तिथीनुसार छत्रपती शिवाजी महाराज यांच्या जयंतीदिनी पार पडला. याच मुहूर्तावर राज्य सरकारने अर्थसंकल्पात शेतकऱ्यांसाठी दोन लाख रुपयांपर्यंतच्या कर्जमाफीची ऐतिहासिक घोषणा केली आहे. “निवडणुकीत दिलेले आश्वासन पूर्ण करणारी ही महायुती सरकारची कृतिशील शिवसेना आहे,” अशा शब्दांत उपमुख्यमंत्री शिंदे यांनी कामाची पावती दिली. “आम्ही मालमत्ता किती कमावली यापेक्षा माणसं किती कमावली, याला अधिक महत्त्व देतो,” असे म्हणत त्यांनी उद्धव ठाकरेंच्या नेतृत्वावर अप्रत्यक्षपणे निशाणा साधला.
? मुंबई |#जळगाव लोकसभा मतदारसंघाचे माजी खासदार आणि उबाठा गटाचे उत्तर महाराष्ट्रातील नेते उन्मेश पाटील यांनी आज #शिवसेना पक्षात जाहीर प्रवेश केला. यावेळी त्यांचे आणि त्यांच्या सहकाऱ्यांचे पक्षात स्वागत करून भावी वाटचालीसाठी शुभेच्छा दिल्या. उन्मेष पाटील यांच्यासोबत आज पंचायत… pic.twitter.com/KP2AErsZBS — Eknath Shinde – एकनाथ शिंदे (@mieknathshinde) March 6, 2026
या राजकीय भूकंपाचे पडसाद संपूर्ण उत्तर महाराष्ट्रात उमटण्याची शक्यता आहे. उन्मेश पाटील यांच्यासोबत आलेल्या कार्यकर्त्यांच्या मांदियाळीत विविध समाजाचे प्रतिनिधी आणि ओबीसी नेते संजय चौधरी, विजू गवळी यांसारख्या प्रभावशाली व्यक्तींचा समावेश आहे. एकाच वेळी भाजप, राष्ट्रवादी आणि ठाकरे गटातील सक्रिय कार्यकर्त्यांना आपल्याकडे खेचण्यात यश मिळवून शिंदेंनी ‘किंगमेकर’ची भूमिका पुन्हा एकदा अधोरेखित केली आहे. यामुळे विरोधी पक्षांमधील गळती आता चिंतेचा विषय ठरत आहे.
या भव्य पक्षप्रवेशावेळी केंद्रीय मंत्री प्रतापराव जाधव, खासदार डॉ. श्रीकांत शिंदे, मिलिंद देवरा, आणि स्थानिक नेते गुलाबराव पाटील व किशोर आप्पा पाटील यांची उपस्थिती लक्षणीय होती. “शिवसेना हा सर्वसामान्यांच्या पाठीशी उभा राहणारा आणि अन्यायाविरुद्ध लढणारा पक्ष आहे,” असे सांगत शिंदे यांनी नव्याने आलेल्या सहकाऱ्यांना भावी वाटचालीसाठी शुभेच्छा दिल्या. जळगावच्या या राजकीय उलथापालथीमुळे आता आगामी काळात जिल्ह्याचे सत्ताकारण नेमकी कोणती कूस बदलणार, याकडे सर्वांचे लक्ष लागले आहे.
भगव्याचे विचार आणि विकासाची जोड देऊन उपमुख्यमंत्री एकनाथ शिंदेंची शिवसेना ज्या पद्धतीने विस्तारत आहे, ते पाहता महाविकास आघाडीसाठी हा ‘जबर हादरा’ मानला जात आहे. ‘माणसं जोडण्याचे’ राजकारण करत शिंदेंनी जळगावात लावलेला हा सुरुंग आगामी निवडणुकीत कोणाच्या पथ्यावर पडणार, याचे उत्तर लवकरच मिळेल.
