मुंबई महापालिका निवडणुकीत एकत्र येऊन राजकीय मैदान गाजवणाऱ्या ठाकरे बंधूंच्या युतीला आता नजर लागल्याची चिन्हे आहेत. विजयाचा गुलाल खाली बसतो न बसतो, तोच 'मातोश्री' आणि 'शिवतीर्था'त एका नव्या राजकीय संघर्षाची ठिणगी पडली आहे. निमित्त ठरलंय ते 'स्वीकृत नगरसेवक' पदाचं! एकीचे बळ दाखवत निवडणुकीत यश मिळवल्यानंतर, आता सत्तेच्या वाटपावरून दोन्ही भावांमध्ये निर्माण झालेली दरी आणि राज ठाकरे यांनी घेतलेली तटस्थतेची भूमिका यामुळे उद्धव ठाकरे यांच्यासमोरील राजकीय अडचणी अचानक वाढल्या आहेत.
राजकारणात कोणतीही मैत्री किंवा युती अटी-शर्तींशिवाय नसते, हेच या घडामोडींवरून पुन्हा एकदा सिद्ध झालं आहे. नुकत्याच झालेल्या मुंबई महापालिका निवडणुकीत उद्धव ठाकरे यांच्या शिवसेनेला तीन स्वीकृत नगरसेवकपदे मिळाली. या तीनपैकी किमान एक पद तरी मनसेच्या पारड्यात टाकले जाईल, अशी राज ठाकरे यांची रास्त अपेक्षा होती. मात्र, ही अपेक्षा फोल ठरल्याने मनसेच्या गोटात तीव्र नाराजी पसरली. या एका निर्णयामुळे दोन्ही भावांच्या राजकीय सलोख्याला तडे जाण्यास सुरुवात झाली असून, राज ठाकरे यांनी थेट उपमुख्यमंत्री एकनाथ शिंदे यांच्याशी जवळीक वाढवल्याने राजकीय वर्तुळात खळबळ उडाली आहे.
भावाची वाढलेली नाराजी आणि आगामी राजकीय धोके ओळखून उद्धव ठाकरे यांनी तातडीने 'डॅमेज कंट्रोल'चा प्रयत्न केला आहे. मनसेची नाराजी दूर करण्यासाठी त्यांनी प्रभाग समितीच्या अध्यक्षपदाची थेट 'ऑफर' राज यांना दिली. मात्र, 'आधीच उल्हास, त्यात फाल्गुन मास' या उक्तीप्रमाणे आधीच दुखावलेल्या राज ठाकरेंनी कोणतीही तडजोड न स्वीकारता ही ऑफर सविनय नाकारली. एवढेच नव्हे, तर आगामी प्रभाग समितीच्या निवडणुकीत पूर्णपणे तटस्थ राहण्याचा मोठा निर्णयही मनसेने घेतला आहे. मनसेच्या या तटस्थतेच्या भूमिकेमुळे महापालिकेत ठाकरे गटाची चांगलीच कोंडी झाली आहे.
मुंबई महापालिकेतील 17 प्रभाग समित्यांच्या अध्यक्षपदासाठी आज उमेदवारी अर्ज दाखल करण्याची अंतिम मुदत आहे. महापौर आणि उपमहापौर पदाच्या निवडीनंतर राजकीय ताकद आजमावणारी ही पहिलीच मोठी निवडणूक मानली जात आहे. येत्या तीन दिवसांत या निवडणुका टप्प्याटप्प्याने पार पडणार आहेत. अशा निर्णायक क्षणी, मनसेने घेतलेली तटस्थतेची भूमिका उद्धव ठाकरेंच्या शिवसेनेसाठी मोठी डोकेदुखी ठरू शकते. एका मताचेही मोल महत्त्वाचे असताना, मनसेची ही अलिप्तता प्रतिस्पर्ध्यांच्या पथ्यावर पडण्याची दाट शक्यता निर्माण झाली आहे.
दरम्यान, या वाढत्या तणावावर पडदा टाकण्याचा प्रयत्न ठाकरे गटाचे मुख्य प्रवक्ते आणि खासदार संजय राऊत यांनी केला आहे. "दोन्ही भाऊ एकत्रच आहेत. जर काही तणाव असेल तर आम्ही स्वतः राज ठाकरेंची भेट घेऊन चर्चा करू. उद्धव ठाकरेही तिथे जातील. माध्यमांनी हा विषय विनाकारण ताणू नये," अशी मवाळ आणि सावरती भूमिका राऊत यांनी मांडली आहे. मात्र, पडद्यामागे रंगणाऱ्या या राजकीय साठमारीत राऊत यांचे शब्द प्रत्यक्षात किती खरे ठरतात, हे पाहणे औत्सुक्याचे ठरणार आहे.
एकंदरीतच, महापालिका निवडणुकीत 'ठाकरे ब्रँड'ची ताकद एकत्र करून मिळवलेल्या यशाला आता अपेक्षाभंगाचे गालबोट लागले आहे. स्वीकृत नगरसेवकाची ही ठिणगी प्रभाग समितीच्या निवडणुकीत कोणता भडका उडवणार आणि यातून 'मातोश्री' सावरणार की 'शिवतीर्थ' सत्तेचा नवा राजकीय मार्ग निवडणार, याकडे आता संपूर्ण महाराष्ट्राचे लक्ष लागून राहिले आहे.
