बारामती विधानसभा पोटनिवडणुकीत उपमुख्यमंत्री सुनेत्रा पवार यांनी प्रचंड मताधिक्याने ऐतिहासिक विजय मिळवत देशाच्या राजकीय पटलावर नवा विक्रम नोंदवला आहे. तब्बल 2,18,930 मतांनी मिळालेला हा विजय केवळ बारामतीतच नव्हे तर संपूर्ण देशात चर्चेचा विषय ठरला आहे. या विजयामुळे त्यांनी यापूर्वी उत्तर प्रदेशमध्ये झालेला 2,14,835 मतांचा विक्रमही मोडीत काढला आहे. या विजयाच्या पार्श्वभूमीवर राज्याचे उपमुख्यमंत्री एकनाथ शिंदे यांनी सोशल मीडियावर ट्विट करत सुनेत्रा पवार यांचे अभिनंदन केले आहे. त्यांच्या या ट्विटमुळे राजकीय वर्तुळात वेगवेगळ्या चर्चांना सुरुवात झाली आहे. शिंदे यांनी सुनेत्रा पवार यांच्या विजयाचे कौतुक करत बारामतीकरांचेही आभार मानले आहेत.
एकनाथ शिंदे यांनी आपल्या ट्विटमध्ये म्हटले आहे की, “दोन लाखांहून अधिक मताधिक्याने निवडून आल्याबद्दल सुनेत्राताई पवार यांचे मनःपूर्वक अभिनंदन. बारामतीकरांनी त्यांना विक्रमी मतांनी विजयी करत एक मोठा विश्वास व्यक्त केला आहे. यामागे विकासाची सातत्यपूर्ण परंपरा आणि जनतेचा ठाम विश्वास दिसून येतो.”त्यांनी पुढे असेही नमूद केले की, स्वर्गीय नेत्यांनी बारामतीच्या विकासासाठी पाहिलेली स्वप्नं पुढे नेण्याची जबाबदारी आता सुनेत्रा पवार यांच्यावर आहे. त्यांच्या मते, बारामतीचा विकासाचा वारसा अधिक मजबूत करण्याची क्षमता सुनेत्रा पवार यांच्यात आहे.
