महाराष्ट्राच्या राजकारणात पवार कुटुंबातील राजकीय समीकरणांवर पुन्हा एकदा चर्चा रंगली आहे. खासदार सुप्रिया सुळे यांनी पवार आडनाव असलेल्या कुटुंबीयांविरोधात निवडणूक लढवणार नसल्याचे स्पष्ट वक्तव्य केल्यानंतर त्यावर उपमुख्यमंत्री सुनेत्रा पवार यांनी महत्त्वपूर्ण प्रतिक्रिया दिली आहे. त्यांच्या एका वाक्यामुळे राजकीय वर्तुळात नव्या चर्चांना उधाण आले आहे. सुप्रिया सुळे यांनी एका कार्यक्रमात बोलताना, “गोविंदराव पवार आणि शारदाबाई पवार यांच्या नातवंडांविरोधात मी कधीही निवडणूक लढणार नाही. गरज पडल्यास दुसरा मतदारसंघ निवडेन, पण कुटुंबातील संघर्ष टाळेन,” असे म्हटले होते. या वक्तव्यामुळे बारामतीसह राज्याच्या राजकारणात खळबळ उडाली होती.
यावर प्रतिक्रिया देताना सुनेत्रा पवार म्हणाल्या, “मी राजकारणात आल्यापासून नेहमी एकच भूमिका मांडली आहे. कुटुंब वेगळं असलं तरी नातेसंबंध टिकले पाहिजेत. सुप्रिया ताईंनी केलेलं वक्तव्य अत्यंत चांगलं आहे. पवार विरुद्ध पवार अशी लढत होऊ नये, ही आमच्या सगळ्यांचीच इच्छा आहे.” सुनेत्रा पवार यांच्या या प्रतिक्रियेनंतर पवार कुटुंबात सौहार्दाचे संकेत असल्याची चर्चा सुरू झाली आहे. राजकीय मतभेद असले तरी कुटुंबीयांमध्ये निवडणुकीच्या माध्यमातून थेट संघर्ष होऊ नये, अशी भावना दोन्ही बाजूंनी व्यक्त होत असल्याचे चित्र दिसत आहे.
.
