वॉशिंग्टन: जगातील अग्रगण्य तंत्रज्ञान कंपन्यांपैकी एक असलेल्या गूगलची पॅरेंट कंपनी अल्फाबेटने मुख्य कार्यकारी अधिकारी सुंदर पिचाई यांच्या वेतन पॅकेजमध्ये मोठी वाढ जाहीर केली आहे. पुढील तीन वर्षांत त्यांच्या संभाव्य एकूण कमाईची मर्यादा सुमारे 692 मिलियन डॉलर, म्हणजेच अंदाजे 6,400 कोटी रुपयांपर्यंत जाऊ शकते. या निर्णयामुळे पिचाई हे जगातील सर्वाधिक वेतन मिळवणाऱ्या सीईओंपैकी (Chief Executive Officer, CEO) एक ठरणार आहेत.
अल्फाबेटकडून देण्यात आलेल्या माहितीनुसार पिचाई यांच्या वेतनाचा मोठा हिस्सा परफॉर्मन्स स्टॉक युनिट्स स्वरूपात असणार आहे. या स्टॉक युनिट्सची लक्ष्यित किंमत सुमारे 126 मिलियन डॉलर ठेवण्यात आली असून ती दोन समान भागांत विभागली आहे. या शेअर्सचे मूल्य कंपनीच्या एकूण शेअरहोल्डर रिटर्नवर आधारित असेल आणि त्याची तुलना S&P 100 निर्देशांकातील इतर कंपन्यांच्या कामगिरीशी केली जाईल. जर अल्फाबेटची कामगिरी अपेक्षेपेक्षा चांगली ठरली तर या पॅकेजची रक्कम दुप्पट होऊन 252 मिलियन डॉलरपर्यंत जाऊ शकते. मात्र कामगिरी कमी पडल्यास त्यातून कोणताही लाभ मिळणार नाही.
याशिवाय पिचाई यांना पुढील तीन वर्षांत 84 मिलियन डॉलर किमतीचे रिस्ट्रिक्टेड स्टॉक्स देण्यात येणार आहेत. कंपनीत कार्यरत राहण्याच्या अटीवर हे शेअर्स टप्प्याटप्प्याने दर महिन्याला दिले जातील. त्यांच्या वार्षिक मूळ पगाराची रक्कम सुमारे दोन मिलियन डॉलर इतकी आहे.
अल्फाबेटने Waymo या सेल्फ-ड्रायव्हिंग टॅक्सी प्रकल्प आणि Wing Aviation या ड्रोन डिलिव्हरी स्टार्टअपच्या वाढीसाठी विशेष स्टॉक प्रोत्साहन योजनाही जाहीर केल्या आहेत. या अंतर्गत पिचाई यांना Waymo साठी 130 मिलियन डॉलर आणि Wing Aviation साठी 45 मिलियन डॉलर मूल्याचे शेअर्स दिले जाऊ शकतात. कंपनीची कामगिरी उत्कृष्ट राहिल्यास या योजनांमधील रक्कमही 200 टक्क्यांपर्यंत वाढू शकते. त्यामुळे सर्व प्रोत्साहन आणि वेतन एकत्रित केल्यास पिचाई यांच्या संभाव्य कमाईची कमाल मर्यादा 692 मिलियन डॉलरपर्यंत पोहोचू शकते.
कंपनीच्या संचालक मंडळाने स्पष्ट केले की Waymo आणि Wing हे दोन्ही प्रकल्प स्वयंचलित वाहन आणि ड्रोन डिलिव्हरीसारख्या अत्याधुनिक तंत्रज्ञानाशी संबंधित असल्याने त्यात अनेक आव्हाने आहेत. मात्र पिचाई यांच्या नेतृत्वाखाली या क्षेत्रांत महत्त्वाची प्रगती झाली आहे. त्यामुळे त्यांना प्रोत्साहन देणे हे कंपनी आणि भागधारकांच्या हिताचे असल्याचे बोर्डाने नमूद केले आहे.
सुंदर पिचाई यांनी ऑगस्ट 2015 मध्ये गूगलचे CEO पद स्वीकारले. त्या वेळी कंपनीचे बाजारमूल्य सुमारे 535 बिलियन डॉलर होते. गेल्या काही वर्षांत या मूल्यात प्रचंड वाढ होऊन ते सुमारे 3.6 ट्रिलियन डॉलरपर्यंत पोहोचले आहे. काही काळासाठी ते चार ट्रिलियन डॉलरच्या पुढेही गेले होते. या मोठ्या वाढीमुळे भारतीय वंशाचे 53 वर्षीय पिचाई अब्जाधीशांच्या यादीत सामील झाले आहेत.
पिचाई यांनी 2004 मध्ये गूगलमध्ये प्रवेश केला आणि Chrome ब्राउझरच्या विकासातून त्यांनी वेगळी ओळख निर्माण केली. त्यानंतर Android विभागाचे नेतृत्व करत त्यांनी कंपनीत महत्त्वाची भूमिका बजावली. कृत्रिम बुद्धिमत्ता क्षेत्रात सुरुवातीला गूगल मागे पडल्याची टीका झाली होती, कारण OpenAI ने 2022 मध्ये ChatGPT सादर केले होते. मात्र त्यानंतर पिचाई यांच्या नेतृत्वाखाली गूगलने नवीन AI मॉडेल्स विकसित करून ते तंत्रज्ञान कंपनीच्या सर्च इंजिनमध्ये समाविष्ट केले.
दरम्यान, पिचाई यांनी गूगलच्या सर्च आणि ॲप स्टोअर व्यवसायाशी संबंधित दोन अँटीट्रस्ट प्रकरणे हाताळली आहेत, तर कंपनीच्या जाहिरात नेटवर्कविरोधातील आणखी एक खटला अद्याप प्रलंबित आहे. त्यांना यापूर्वी डिसेंबर 2022 मध्ये सुमारे 218 मिलियन डॉलरचा मोठा स्टॉक अवॉर्ड देण्यात आला होता.
नियामक कागदपत्रांनुसार पिचाई आणि त्यांची पत्नी अंजली यांच्या मालकीचे एकूण 1.67 मिलियन गूगल शेअर्स आहेत. शुक्रवारी प्रति शेअर 298 डॉलर दराने या शेअर्सची किंमत सुमारे 498 मिलियन डॉलर इतकी होती. गूगलचे सहसंस्थापक सर्गेई ब्रिन आणि लॅरी पेज अजूनही “सुपर व्होटिंग” क्लास B शेअर्सद्वारे कंपनीवरील नियंत्रण राखून आहेत आणि त्यांच्याकडे सुमारे 56 टक्के मतदान शक्ती आहे.
तुलनेत, मायक्रोसॉफ्टचे CEO सत्य नडेला यांनी 2025 आर्थिक वर्षात सुमारे 96.5 मिलियन डॉलर इतकी कमाई केली होती, ज्यातील बहुतांश रक्कम स्टॉक अवॉर्ड्सच्या स्वरूपात होती. त्याचप्रमाणे ॲपलचे प्रमुख टिम कुक यांनी 2025 मध्ये सुमारे 74.3 मिलियन डॉलर इतके वेतन मिळवले होते.
