मुंबई: बॉलिवूड अभिनेता सैफ अली खानवरील चाकू हल्ल्याप्रकरणातील मोठी अपडेट समोर येत आहे. वांद्रे पोलिसांनी अनेक पुराव्यांसह 1000 पानांचे आरोपपत्र दाखल केले आहे. वांद्रे न्यायालयात दाखल केलेल्या या आरोपपत्रात अनेक महत्त्वाचे पुरावे सादर करण्यात आले आहेत. मुंबई पोलिसांनी दिलेल्या माहितीनुसार, या आरोपपत्रात पोलिसांनी अटक केलेल्या आरोपी शरीफुल इस्लामविरुद्ध सापडलेले अनेक पुरावे आहेत. हे आरोपपत्र 1000 पेक्षा जास्त पानांचे आहे. या आरोपपत्रात फॉरेन्सिक लॅब रिपोर्टचाही उल्लेख करण्यात आला आहे. या प्रकरणात फॉरेन्सिक लॅबचा अहवाल एक महत्त्वाचा दुवा ठरू शकतो.
तिन्ही तुकडे एकाच चाकूचे –
फॉरेन्सिक लॅबच्या अहवालानुसार, गुन्ह्याच्या ठिकाणी सापडलेला चाकूचा तुकडा, सैफ अली खानच्या शरीरात सापडलेला चाकूचा तुकडा आणि आरोपीसोबत सापडलेला चाकूचा तुकडा, हे तिन्ही तुकडे एकाच चाकूचे होते. यावरून हे स्पष्ट झाले की, आरोपी शरीफुल इस्लामने सैफ अली खानवर हल्ला करण्यासाठी त्याच चाकूचा वापर केला होता.
हेही वाचा – सैफ अली खान मारहाण प्रकरणात मलायका अरोरा विरोधात वॉरंट
CCTV मध्ये दिसणाऱ्या व्यक्तीची ओळख अटक केलेल्या आरोपीशी जुळली –
तपासादरम्यान पोलिसांनी मिळवलेल्या आरोपीच्या डाव्या हाताच्या फिंगरप्रिंट रिपोर्टचाही आरोपपत्रात उल्लेख करण्यात आला आहे. यासोबतच, गुन्हा केल्यानंतर आरोपी घटनास्थळावरून पळून गेल्याचे सीसीटीव्ही फुटेज देखील उपलब्ध आहे. फॉरेन्सिक तपासणीदरम्यान, सीसीटीव्हीमध्ये दिसणाऱ्या व्यक्तीच्या चेहऱ्याची ओळख विश्लेषण चाचणी अटक केलेल्या आरोपीशी जुळली आहे.
प्राप्त माहितीनुसार, 16 जानेवारी रोजी आरोपींनी वांद्रे येथील अभिनेत्याच्या घरात घुसून दरोडा टाकण्याचा प्रयत्न करताना सैफ अली खानवर हल्ला केला होता. या घटनेदरम्यान सैफ अली खान गंभीर जखमी झाला. त्याला पाठीचा कणा आणि शरीराच्या इतर भागांना दुखापत झाली. त्यानंतर सैफ अली खानला लीलावती रुग्णालयात दाखल करण्यात आले. 5 दिवसांच्या उपचारानंतर 21 जानेवारी रोजी त्यांना डिस्चार्ज देण्यात आला.
